Angut 35-nik ukiulik toqutsisimasutut unnerluutigineqartoq
![](/sites/default/files/styles/image_934x467/public/article_images/330199402_548895967305999_3855472322260375021_n.jpg?itok=3HVhY-vO)
Unnerluussissut naapertorlugu 53-inik ukiulik siorna februaarip pingajuata sisamaatalu akornanni toquvoq.
Angut 35-nik ukiulik toqutsisimasutut unnerluutigineqartoq Eqqartuussisoqarfik Kujallermi sapaatip akunnerata tullia tamaat eqqartuussaassaaq.
Pisoq Qaqortumi pivoq, angutillu taakku marluk pisoqarnerata nalaani najugaqatigiittut, unnerluussisussaatitaasoq, Alexander Stürup oqarpoq.
Unnerluussut naapertorlugu angutip 35-nik ukiullip pinerlineqartoq ‘timaatigut niaquatigullu qasseeriarluni patittarlugulu isimmigarpaa’. Patittarneqarnera ‘isilerfiata iluatigut illuttut nuttanneqalerneranik, najungasuisa sisamat napinerannik tunumigullu tilluusaqalerneranik’ kinguneqartoq, unnerluussissummi allassimavoq.
Aammattaaq 35-nik ukiullip angut 53-inik ukiulik siatsivimmik ikinnerpaamik ataasiarluni anaasimagaa, angullu taamaalilluni niaqumi saarngani allatigullu innarlerneqarpoq, tamannalu toquneranik kinguneqarluni.
Suliaq annertoorujussuaq
Naak unnerluussissummi immikkoortoq "ataasiinnaagaluartoq" suliaq annerungaatsiartoq, Alexander Stürup paasissutissiivoq.
- Suliaq sivisuumik suliarineqarpoq, pissutigalugu politiit annertuumik misissueqqissaartariaqarsimammata. Politiit pinerluuteqartumik kinaassuserniarlutik pisorlu pasineqartumut atassuserniarlugu piffissaq sivisooq atorpaat, taanna oqarpoq.
Suliap annertussusaa suliaqarnermi atorneqartutigut ilisimannittullu allattorsimaffiatigut aamma takuneqarsinnaavoq. Ilisimannittutut eqqartuussivimmi nassuiaateqartussat 16-it aggersarneqarput, suliaqarnermini atorneqartut 1.853-inik qupperneqarlutik.
Politiit suliamik misissueqqissaarnerminni 60-it missaanniittunik killisiuisimasut unnerluussisussaatitaasup oqaatigaa. Taassumalu angutip 35-nik ukiullip piffissami killiligaanngitsumi paarineqalernissaa piumasaqaatigaa.
Pilersaarut malillugu eqqartuussivimmi suliami aggustip 23-ani eqqartuussuteqartoqassaaq.