Angut 33-nik ukiulik Qaanaami piaaraluni ikuallatsitsisimasutut killiligaanngitsumik paarineqartussanngortoq

Angut 33-nik ukiulik 2022-mi ukiortaami Qaanami ikuallatitsitsimasutut persuttaasimasutut qunusaarisimasutullu Qaasuitsup eqqartuussiviani marlunngormat jannuaarip ulluisa 17-anni eqqartuunneqarami pisuutinneqarpoq. Angut taanna killigaanngitsumik pineqaatissinneqarpoq.

Angutip 33-nik ukiullip siorna 2022-mi ukiortaami ataatami illuani ataatani peqqarniitsumik persuttarpaa.

Ataatani persuttareerlugu illu ikuallatsipaa, unnerluussissussaatitaasullu paasininnera naapertorlugu ataataasoq arnarlu ilisarisimasaq illup ikuallatsinneqarnerani illumiissimapput.

Politiit illumut apuunneranni ataataasoq arnarlu sanilimminnut qimaasimapput.

Angut 33-nik ukiulik ingerlaannaq tigusarineqarpoq, kingusinnerusukkullu peqqarniitsumik persuttaasimasutut piaaraluni ikuallatsitsisimasutut, ataatani arnarlu ilisarisimap inuunerannik ulorianartorsiortitsisimasutut, politiinillu tigusariniarneqarnermini qunusaarisimasutut unnerluutigineqarpoq.

Pisut taakkua saniagut angutip 33-nik ukiullip tigusarineqarnissani sioqqullugu, pisunut assigiinngitsunut arfineq marlunut unnerluutigineqarpoq, tassalu persuttaasimasutut qunusaarisimasutut tillinniarsimasutullu unnerluutigineqarami.

Eqqartuussisoqarnerani angut 33-nik ukiulik nassuerpoq, ataatani persuttarsimallugu illulu ikuallatsissimallugu.

Inuit inuunerannik ulorianartorsiortitsisimannginerarpoq, nammineq paasininni naapertorlugu illu ikuallatsikkamiuk illumiittut anereersimagamik.

Angut 33-nik ukiulik ikuallatitsisimasutut, marloriarluni persuttaasimasutut, arlaleriarlunilu qunusaarisimasutut tillinniarsimasutullu pisuutinneqarpoq.

Angutip ataasiarluni qunusaarisimaneranik ikuallatsitsinermilu inuit allat uloriarnartorsiortinneqarnerannik unnerluutigineqarnerani pinngitsuutinneqarpoq.

Angutip illersuisuisata pineqaatissiissutigineqarpoq suliassanngorteqqippaa pinngitsuutinneqarnissaa piumasaralugu.