Angut 25-nik ukiulik Uummannami ikuallatsitsinikkut toqutsisimasutut unnerluutigineqartoq

Uummannami angut 25-nik ukiulik ukioq manna novembarip ulluisa 28-anni piaaraluni ikuallatsitsinikkut toqutsisimasutut pasineqarluni Qaasuitsup Politiivinit ippassaq decembarip ulluisa aappaanni tigusarineqarpoq. Qaasuitsup Politiivisa tusagassiuutinut nalunaarummi tamanna allaaseraat.
Allattoq Mads Lynge
decembarip 03-at 2015 11:10

Uummannami illu ikuallattoq Uummannami politiinut novembarip ulluisa 28-anni kalerriutigineqarpoq. Suliaq piaaraluni ikuallatsitsisoqarsimasutut isigineqarluni aallartinneqarpoq. Inuk ikuallagussaasimasoq ataaseq illup qaminniarneqarnerani siumorneqarsimasoq nalunaarutigineqarpoq.

Politiit paasiniaanerminnut atatillugu toqusoqarsimatillugu misissuisartumik aggersaapput, toqungasup siumorneqartup kinaassusersineqarnissaa sunalu toqqutigisimaneraa paasiniarneqarluni. Ikuallagussaasimasup kinaasinnaanera ilimagalugu politiit nalunaarutigaat, kisiannili angutaasoq taamaallaat maanna oqaatigisinnaallugu.

Politiit paasiniaanerat angutip 25-nik ukiullip tigusarineqarneranik kinguneqarpoq, angullu taanna toqutsisimasutut unnerluutigineqarluni. Angut taanna inatsit tunngaviusoq aallaavigalugu ippassaq decembarip ulluisa aappaanni killisiorneqarpoq, ullunilu 27-ni tigummigallagassanngortinneqarluni.

Politiit suliamut atatillugu suli paasiniaapput, ikuallattoqarsimatillugulu paasiniaasartunik aamma aggersaasoqarsimalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq