Politiit ullormut nalunaarutaat: Angut 22-nik ukiulik umiatsiartilluni sikorsuarnut kiggigussaavoq

Angut 22-nik ukiulik pocamik umiatsiarluni Qaqortumiit ataasinngornermi ualikkut aallareernermini sikorsuarnut kiggigussaavoq. Tamanna upalungaarsimasut annaassiniarnerannik kinguneqarpoq, angulli taanna umiatsiartunit allanit annaanneqarluni.

Allattoq Nicole Sander Bertelsen

februaarip 04-at 2025 08:52

Nutserisoq Hanne Petersen

Politiit angummit 22-nik ukiulimmit Qaqortup Narsallu akornanni umiatsiartilluni sikorsuarnut kiggigussaasumit ataasinngornermi unnukkut arfinermut qiteqqulluinnalertoq sianerfigineqarput.

- Umiatsiartilluni sikorsuarnut kiggigussaasimalluni nalunaarpoq, taamaammat upalungaarsimasortavut Issittumi Sakkutooqarfimmeersullu annaassinialertortippavut, Kalaallit Nunaanni Politiit pigaartuisa pisortaat Jeppe Andsager marlunngornermi ullaakkut oqarpoq.

Aamma atuaruk Politiit ullormut nalunaarutaat: Ukiukitsoq Nuummi lastbiilimik tillittoq

Politiit angummik 22-nik ukiulimmik umiatsiartunik annaassiniaqatissarsioqqaarput, iluatsinngitsumilli.

- Umiatsiarlunimi annaassiniarneq navialinarsinnaavoq, Jeppe Andsager oqarpoq.

Taamaammat Issittumi Sakkutooqarfiup upalungaarsimasui Kangerlussuarmiit qulimiguulimmik aallarlutik annaassiniariartorput. Taakkuali suli anngutinngitsut angut 22-nik ukiulik umiatsiartunit allanit annaanneqarpoq.

- Angut 22-nik umiatsiartunit allanit annaanneqareerluni Narsaliaanneqarsimasoq ajunngitsorlu unnuap qeqqa qaangeraa nalunaarfigineqarpugut, Jeppe Andsager oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.