"Angerlartitaaqqinnissara ilimagiuaannaraluarpara"
- Ilaqutaqanngilagut, qatannguteqanngilagut namminerisatsinnillu oqaaseqarata. Tamakkualu piginngikkutsigit kinaassuserput annaassavarput, eqqarsartaaseralumi allaat. Misiliummilu tamaasa annaavakka. Carla Lucia Knakkergaard suliunnaarnersiutilittut ullumi inuuvoq. 1951-imulli utersaarutta Carla taamani arfineq pingasunik ukioqarpoq, Qullissani najugaqarluni. Niviarsiaraq Carla arfineq pingasunik ukioqarluni meeqqat allat 21-t assigalugit Danmarkimi pisortanit immikkut toqqarneqarpoq misiliummi ilaatinneqassalluni. Kalaallit Nunaanni atuartitaaneq qallunaanngorsarneqassaaq, meeqqallu immikkut toqqarneqartut siuttuussapput, meeqqanut allanut maligassiuisussat. Carla iliarsuuvoq kisianni ilaqutaqarpoq. Carlap aamma aniata Alaufip, taamani ilaqutariit ittorisaata, Carlap aallartinneqarnissaa isumaqatiginngilaat kissaatiginagulu.
- Ilaquttakka ilisimatinneqaannarput angalaassasunga. Aperisoqanngilarluunniit. Alaufip aallarnissara akuersaanngilaa, akineqaannarporli meeqqat tamaasa kisimi pilersuinnassallugit piumassuseqaannarsinnaanngitsoq. Allatut ajornaqaaq, Carla umiarsuarmut Danmarkiliartumut ikitinneqarpoq, arlaannaataluunniit ilisimanngilaa qaqugu utissanersoq. Ilaqutariit amerlasuut isumaqarput meeqqat feriartinneqarlutik Danmarkimut angalatinneqartut. Meeqqat piffissami siullermi Red Barnet-ip feriartitsisarfiani Sjællandimiisinneqarput. Kingorna Danmarkimi assigiinngitsunut aallartinneqarlutik angajoqqaarsiartaartinneqarput. Anguniagaat ersarippoq kalaaliaqqat qallunaajaranngortinniarneqarput.
- Qallunaatuinnaq perorsarneqarpugut, immitsinnut kalaallisut oqaluuteqqusaanngilagut, tamannami inerteqqutaavoq. Kalaallisut oqaatsigut puigortariaqarpagut.
Misiliinerup ingerlanneranni pisortanit paasineqarpoq siunertaq angujuminaatsuusoq piviusorsiortuunngitsuusorlu. Meeqqalli 22-t angerlarteqqinnagit nutaamik pilersaarusiortoqarpoq. Meeqqat Kalaallit Nunaannut uterteqqinneqassapput, maannali Nuummut meeqqat angerlarsimaffiannut utertinneqassasut siunniunneqarpoq. Taama pisoqarnerata nalaani angajoqqaarsiaasut ilaasa meeqqat nuannarilerpaat, angajoqqaarsiaasullu amerlasuut - sunniutilinnut attaveqaateqarluartut - meeqqat meeravissiartaarinissaannut iluatsitsipput. Carla Lucia meeravissiartaarineqartut ilagaat.
- Eqqarsartuaannarpugut utimut angerlaqqissalluta, taamatummi oqarfiginikuuaatigut. Suna tamaat kipitsavigisaqaara, qatanngutikka, inunngorfinga peroriartorfigisaralu, namminerlu oqaatsikka. Ilami Danmarkip Kalaallit Nunaatalu assigiinngissusaat annertoorujussuupput.
Aatsaat 1974-imi, 31-nik ukioqarluni Carla Kalaallit Nunaannut aallarpoq qatanngutini takusarniarlugit. Takoqqinneq nuanneqaaq, neriuutigisaaniilli naapeqqinnerat allaanerullunilu ajornakusoorneroqaaq.
- Qatanngutima Gabrielip paasisinnaanngivippaa sooq Kalaallisut oqalussinnaannginnersunga. Tamanna pillugu nassuiaanniarsarigaluarpara. Ila, allaat kalaallisut oqalussinnaannginnera pillugu illumit anisingajavippaangaluunniit. Qatanngutimma sinneri kalaallisuinnaq oqaaseqartuupput, misigissutsikkalu paasisinnaanngilaat taakkualu qanoq misigineri paasisinnaanngilakka. akimmiffigisarpullu taanna peersinnaanngilarput. Anniarneq kiisalu aliasunneq annertoqaaq.
Misiliut eqqartorneqaqqinnavianngitsoq, Carla isumaqarpoq, aatsaallu Naalagaaffiup meeqqat 1950-ikkunni misiliutigisani kukkunertut nassuerutigippagit oqallisigilerneqarsinnaapput.
- Taava kukkusut paasissavaat iliuuserisatik kukkunerusut, taava Kalaallit Nunaanni ilaquttama iluamik paasissagaluarpaat qanoq pisoqarnersoq. Iluaqutaassagaluarpoq... arlaatigut iluaqutaalaassagaluarpoq.
