Angerlarsimaffinni ikorneqartarnermut kommunit aningaasalersuineri assigiinngillat

Angerlarsimaffinni ikiortinut kommunit aningaasartuutaat kommunimit kommunimut kisimik assigiinngissuteqanngillat. Aamma kommunini utoqqaat pisinnaanngitsullu angerlarsimaffiini ikiorneqartarnerannut kommunit ataatsimut aningaasartuutaat assigiingillat.
Allattoq Apollo Jeremiassen
decembarip 13-at 2013 09:59

Qaasuitsup Kommuniani utoqqarnut allanullu ikorneqarnissaminnik pisariaqartitsisunut 450-inut, kommunip ukiumut aningaasartuutigisarpai 20 million koruunit missaanniittut.

Kommuneqarfik Sermersuumi utoqqaat allallu angerlarsimaffimminni ikiorneqarnissaminnik pisariaqartitsisunut 255-inut aningaasartuutaasarput 11,3 million koruunit.

Kommunit taakku marluk inuttussusaat assigiinngitsuupput. Qaasuitsup Kommuinia innuttakinnerusoq taamaattoq angerlarsimaffinni ikiorneqartartartut Kommuneqarfik Sermersuumut naleqqiullugu amerlanerupput.

Qeqqata Kommuniani angerlarsimaffinni ikiorneqartarnermut ukiumut aningaasartuutaasarput 6,3 million koruunit, taakku ikiorneqartartunut 192-inut atorneqartarlutik.

Kommuni Kujallermi ikorneqartartunut 90-it missaanniittunut aningaasartuutaasarlutik 8,3 million koruunit.

Kommunit taakku assigiinngissusaat ersarissoq tassaavoq, Qeqqata Kommuniani ikiorneqartartunut 192-isut aningaasartuutit taamaallaat 6,3 million koruuniummata Kommuni Kujallermi ikiorneqartartunut 90-it missaanniittunut aningaasartuutit 2 million koruuninik amerlanerullutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq