Angerlarsimaffinni eqqissiviilliornerit ikilinissaannut oqaloqatigiittarneq sakkussaavoq
![](/sites/default/files/styles/image_934x467/public/article_images/politi_vinterbillede.jpg?itok=M12FfZZ2)
Angerlarsimaffinni eqqissiviilliorfiusartuni meeqqat eqqorneqartartut ikilisinniarlugit, suliniut aallartinneqarpoq taallugu, "Angerlarsimaffiup iluani nakuuserata oqaloqatigiitta". Taamaaliornikkut angerlarsimaffinni eqqissiviilliortarnerit ataatsimut isigalugu ikilisinneqarnissaat anguniagaasoq, Nuummi vicepolitiinspektørip, Viggo Johansenip oqaatigaa.
- Tassa imaappoq, angerlarsimaffimmi eqqissiviilliortoqarsimappat, taava angerlarsimaffik aqaguani takuniaqqittarparput, inunnik isumaginnittoqarfimmi sullissisunik, suleqatigilerluarsimasatsinnik peqateqarluta taamaaliortarluta, vicepolitiinspektør Viggo Johansen oqarpoq.
Angerlarsimaffinnut eqqissiviilliorfiusunut takuniaaqqittarneq Sisimiuni misilittagaqarfigineqareersoq iluatsilluartutut oqaatigineqarpoq, taamaaliortarnerlu Nuummi aamma misilinneqassalluni, tamatumalu kingorna suliniut tamanna Nunatsinni tamarmi atugaalissasoq siunniunneqarluni. Suliniut tamanna Meeqqat Illersuisuata, Aaja Chemnitz Larsenip nuannaarutigaa.
- Politiit tamanna suliniutigiligaat pitsaalluinnartuuvoq tapersersorneqartariaqartorlu.
Aaja Chemnitz Larsenip ilanngullugu oqaatigaa, angerlarsimaffinni eqqissiviilliornerni meeqqat timikkut annersarneqartarnerisa pinngitsoortinneqartarnissaat suliniutaallualereersoq. Meeqqallu Illersuisuat ima nangilluni oqarpoq.
- Eqqissiviilliornerni meeqqat tarnikkut annersarneqartullusooq pineqartarput, aamma ilaanni misigisaramikku unatarneqarnissamik sioorasaartinnerit. Aamma angerlarsimaffinni eqqisiviilliornerni inersimasut unataanneri meeqqat tarnimikkut attorneqaatigisarpaat annertuumik, Aaja Chemnitz Larsen oqarpoq.
Meeqqat angerlarsimaffinni illersorniarlugit politiit anguniarpaat, angerlarsimaffinni eqqisiviilliiornerit Nunatsinni ikilisinneqarnissaat.
- Anguniagaavoq angerlarsimaffinni eqqissiviilliornerit Nunatsinni ikisarneqarnissaat, tassami ukiumut 3000-it missaanniittarput, kisitsillu tamanna annertuvallaaqaaq, Viggo Johansen oqarpoq.
Taassuma nagilluni oqaatigaa, angerlarsimaffinni eqqissiviilliortarnerit politiit sulinerinut attuumassuteqanngimmat aamma inunnik isumaginnittoqarfinnut napparsimmaveqarfinnullu attuumassuteqarluartuusoq, Viggo Johansenip oqaatigaa.
Politiit kisimiillutik suliniuteqarneri naammanngitsoq Sisimiut politeeqarfiannit ilisimaneqarpoq misilittagarfigineqalereerlunilu. Tassami politiit inunnik isumaginninnermik suliaqanngillat taamaattumillu tamakkuninnga ilisimasalinnik suleqateqarnissaq pingaarluinnartuusoq paasineqarsimalluni.
Suleqatigiilluni suliniuteqarneq Meeqqat Illersuisuata nuannaariutigaa oqaatigalugulu taama ikoqatigiinnermi ajornartorsiutit annertusinnginnerini akuleruttarnissaq pingaaruteqarluartuusussaassammat.
- Inunnik isumaginnittut eqqissiviilliortoqarnerata kingorna sillissisussaapput. Tamannaannarluunniit eqqarsaatigalugu nuannaarutaaginnarsinnaavoq suliffeqarfiit akimorlugit suleqatigiinnikkut ajornartorsiut suliniutigineqalermat, tassalu taamaaliornikkut meeqqat ikiorneqarnissaat salliutinneqalissalluni. Meeqqat Illersuisuat, Aaja Chemnitz Larsen taama oqarpoq.