Angerlarsimaffeqanngitsut VM-eqarnerani Dansk-it anngusinnaapput

Angerlarsimaffeqanngitsut nunarsuaq tamakkerlugu isikkamik arsaallutik pissartanngorniunneranni, Danmark-imit peqataatitat ingerlalluarput. København-imi Rådhusplads-imi ullumi unamminermi siorna VM-imi sølv-innannikut Kasakhstan-imiut ajorsartinneqarput Danmark quleraarluni Kashakstan-imiut qulingiluaraartut, unammineq strafferluni iserititseriaqattaarnerup kingorna naammassineqarpoq. Angerlarsimaffeqanngitsut isikkamik arsaallutik nunarsuarmi pissartanngorniunneranni qallunaat pissartanngornissaat suli neriuunaateqarpoq. Unamminerit nalinginnaasumik marloriarluni minutsinik arfineq marlunnik sivisussuseqartut ingerlanneqareersut, akerariit tamarmik arfineq marloraarput, strafferlunilu isertitseriaqattaarnermi akerariit tamarmik qulingiluariarlutik isertitsipput, Danmark-illu ajugaassutaasussaq isertinneqarmat, Rådhusplads-imi arsaattunik isiginnaartut nillerrapput, Rådhuspladsen tamaat nippaallugu. Angerlarsimaffeqanngitsut isikkamik arsaallutik nunarsuarmi pissartanngorniunnerat arfininngornerup ualiata tungaanut ingerlanneqassaaq, Danmark sinnerlugu arsaqataasuni kalaaleqaterput Erik Ludvigsen VM-imi unammeqataavoq. Arfininngorpat pissartanngorniutivinnissami Kunngissaq Frederik isiginnaariassamaarpoq.

Ullumi unamminerup aappaani Danmark Cameroun-illu unammineranni Danmark ajorsarpoq 5 – 1-imik taamakkaluartoq ajugaaniutivinnissamut Danmark periarfissaqarpoq, aqagu sisamanngorpallu unammineqartussaavoq ullunilu tulliuttuni ajugaaniutivinnissamut anngussinnaaluni.