Angerlarsimaffeqanngitsut nalunaarusiarineqarput

Københavnimi kalaallinut angerlarsimaffeqanngitsunut attaveqatigiinneq pingaaruteqarpoq. Center for Kultur Analysep nalunaarusiaani nutaami saqqummeqqammersumi taama allassimasoqarpoq. Nalunaarusiap pingaarnertut sammivai kalaallit atugarliornerusut, taakkununngalu suliniutit sukumiinerusunngortinneqarnissaat anguniagaavoq.

Nalunaarusiap takutippaa kalaallit atugarliornerusut angerlarsimaffeqanngitsullu imminnut najorusunnerusartut najugaqatigiikkusunnerusartullu. Tukkusaqattaannerlu aamma atugaasorujussusoq paasineqarsimavoq. Tamanna isumaqarpoq amerlasuut pisortanit malugineqaratik sivisuumik inuusinnaasut. Akerlianik taamatut najugaqatigiinneq nalorninermik toqqissisimanginnermillu assut nassataqartartoq erseqqissaatigineqarpoq. Pingaartumik arnanut taamatut inuusunut inuttut ajornartorsiortitsingaatsiarsinnaalluni.

Misissuineq kalaallinik 137-nik angerlarsimaffeqanngitsunik misissuineruvoq. Tassani angutit 83-it arnallu 54-t misissuinermut ilaapput.

Paasiniaaffigineqartut angerlarsimaffeqannginnerup ajornartorsiutiginerata saniatigut aamma imerajunnermik ikiaroorajunnermik, peqqiilliornermik inunnullu isumaginnittunut amigartumik attaveqarnermik ajornartorsiuteqarajuttarput.