Angerlarsimaffeqanngitsut illorsuartaarput
Angerlarsimaffeqanngitsunut unnuisarfik suli anginerusoq Nuup ilaani Nuukullammiitoq piareersarneqaleruttortoq iserfigaarput, unnuisarfillu taanna aqagu ammaanersiorneqassammat aqutsisuat Storm Ludvigsen aperaarput tamanna qanoq igineraat.
- Nuannaaqaanga ullumikkut tassami illorsuartaarpugut, taamaalilluta imatut naalagarsiorpallaarunnaartussanngorpugut, pisattat qanorluunniit nammineq allanngortissinnaanngorlutigit pisinnaanngorpugut. Kananilu atitsinni maani unnuisalertussat ulapputtorsuupput, Storm Ludvidsen nuannaarluni unnersiorpoq.
Taanna aperaarput inuit qassit unnuisinnaanerat atuisussat namminneq aalajangertassaneraat.
- Uani inerujussuarmiittoqassaaq, aamma qamaniittoqarpoq ineerannguamik allamik. Eqqarsaatigivarput arnat immikkoortinniarlutigit taamaalillutik atugaat ajunnginneruniassammata, Storm Ludvigsen oqarpoq.
Taanna aamma unnersiorpoq unnuisarfik uffarfeqarmat piumagunik uffariarlutik innartarsinnaasut.
Angerlarsimaffeqanngitsumik 26-nik ukiulimmik aamma apersuivugut.
- Iluaqaaq! Qamuuna toqqissiallannaqaaq, uffarfissaqalerlunilu angerlarsimaffeqanngitsut immikkut ataatsimoorfissaqalerput, periarfissaq taanna assut tulluusimaarutigivara, oqarpoq.
Taanna nangilluni oqaluttuarpoq ulluunerani sulisarluni sulinngikkaangamili illoqarfimmiittarluni assersuutigalugu atuakkanik atorniartarfimmi, Brugsenip saavani aammalu neriniartarfinni soorlu Igaffimmi.
- Uagutsitulli inuupput, angerlarsimaffeqanngitsuunertik pissutigalugu nallinnanngillat. Angerlarsimaffeqanngikkaluarlutik sulerusussutsimik peqarput. Atuisullu arlallit suliffeqartuupput, arlallillu aamma sulileriaannaapput, Storm Ludvigsen oqarpoq.