Angerlarsimaffeqanngitsup toqunerata kingorna piareersimasuutitat isornartorsiorneqartut
Angut illoqannginersami tassani nalasoq ajoqusersimasoq, ilisimajunnaaqqanngitsorli, inuit pisuinnaat takusimavaat. Takunnittut politiinut ikinnerpaamik pingasoriarlutik kalerriutigisarsimagaluarpaat, kisianni soorlu piareersimasuutitat oqarnerattuut angut aalakoortuinnaagunarmat annerusumik qisuariartoqarsimanngilaq. Allaat takunnittunit oqaatigineqarpoq piareersimasuutitat aperisimasut angut pineqartoq kalaaliunersoq.
AAMMA ATUARUK Kalaaleq angerlarsimaffeqanngitsoq alianaqisumik toqukkut qimaguttoq
- Angerlarsimaffeqanngitsullu pillugit suliat tamaanga killeqanngillat, tassami suliassat angerlarsimaffeqanngitsunut tunngagaangata piareersimasuutitat ornigunneq ajortarsimammata, Danmarkimi Angerlarsimaffeqanngitsut Kattuffianni, SAND-imi, tusagassiisartoq Sofie Bay-Petersen, aviisimut Jyllands-Postenimut oqarpoq.
- Angerlarsimaffeqanngitsut piareersimasunut sianeraangamik ilaatigut aperineqartarput aalakuuginnannginnerlutik. Tamanna malunnavissumik pigajuppoq. Uagut sianeraangatta taama aperineqarneq ajorpugut, Sofie Bay-Petersen Jyllands-Postenimut oqarpoq.
Taamatut pisoqartarnera takussaaleraluttuinnartoq
Angerlarsimaffeqanngitsunut tunngagaangat piareersimasuutitat kigaappallaamik ikiuiniartarnerat ukiuni kingullerni takussaaleraluttuinnarsimasoq, Inuuniarnermikkut sumiginnagaasimasut pillugit siunnersuisoqatigiinni siulittaasup Jan Sjurssenip oqaatigaa.
Piareersimasuutitat Region Hovedstadenimeersut pingasut suliamut atatillugu angerlartinneqarallarsimapput, nassuiaasiortoqarnissaalu piumasarineqarluni. Sianertoqarneranulli atatillugu immiussani aamma tusaaneqarsinnaavoq ajornartorsiortoq kalaaliunersoq apeqqutigineqarsimanngitsoq, Jyllands-Posten allappoq.
