Kalaaleq angerlarsimaffeqanngitsoq alianaqisumik toqukkut qimaguttoq

Angut nunaannarmi nalasoq saneqquasunit maluginiarneqarsimavoq. Angullu imigassartorpallaarsimanngikkuni ikiaroornartutorpallaarsimalluni peqqiilliortupilussuaq suli ilisimasoq takunnittut arlallit napparsimmavimmut ikioqqullugu kalerriutigisimavaat.

Takunnittut Danmarkimi tusagassiorfinnut arlalinnut oqaluttuarput, ikiuisussat apuunniaasaarsimasut, ambulancellu nakorsarlu kiisami takkummata angut 32-nik ukioqartoq toqoreersimasoq. Københavnimi Politiit taama ilisimatitsipput.

AMK-Vagtcentralimi, pisoq pillugu kalerrinneqartumi, immikkoortortami pisortaq, Marit Karina Buccarella, aviisimut ullormut saqqummersartumut Politikenimut ima oqaluttuarpoq:

- Sianerfigineqaqqaarnitsinnit ambulancep nakorsallu takkunnissaannut piffissaq sivisuallaartoq ingerlavoq. Taakkumi apuunnerini innuttaasoq pineqartoq alianaraluaqisumik toqoreersimavoq. Tamanna assut ajuusaarnarpoq.

Københavnimi Politiit naapertorlugit angut pineqartoq angerlarsimaffeqanngitsuuvoq. Ilaqutai maanna kalerriortoqaleruttorput.