Ilisimatusarfimmi inuiaqatigiit pillugit ilisimatooq Steven Arnfjord

Ilisimatooq: Angerlarsimaffeqanngitsunut iliuusissat ujartorneqarput

Angerlarsimaffeqanngitsut ikiorneqarnissaannut inuiaqatigiillu angerlarsimaffeqanngitsunut iliuusissanik kommunit naalakkersuisullu pilersaarusiortariaqarput. Ilisimatusarfimmi angerlarsimaffeqanngitsut pillugit immikkut ilisimatusartoq Steven Arnfjord taama oqarpoq.

Angerlarsimaffeqangitsut isumagineqannginnerat akuerineqarsinnaanngitsoq taanna isumaqarpoq.

Nuna tamakkerlugu kommunillu isumagiinninnermut periusaanni erseqqissunik arlaqartunik amigaateqartoqarpoq,  innuttaasut inuttut ajornartorsiortorujussuarneranni iliuusissanik,  Inuit atugaat pillugit Ilisimatusarfimmi inuiaqatigiilerinermik immikkoortortami pisortaq Steven Arnfjord taama oqarpoq.

AAMMA ATUARUK Inuttut ajornartorsiuteqartut ikiorneqartariaqarput

Isumaginninnermut Naalakkersuisuip Sara Olsvigip  ataasinngornermi nalunaarutigaa, Kalaallit Nunaanni tamarmi angerlarsimaffeqanngitsut 878-usut.

AAMMA ATUARUK Innuttaasut 878-it angerlarsimaffeqanngitsuupput

Sara Olsvigip parteeqataata Aaja Chemnitz Larsenip  angerlarsimaffeqanngitsut qanoq amerlatiginersut paaserusullugu apeqquteqarpoq,
Kalaallit Nunaannimi innuttaasunut ajornartorsiuteqartunut ikiuunnissamut  Kalaallit Nunaanni pigineqanngimmata.

Steven Arnfjordip Aaja Chemnitz Larsen isumaqatigaa. Ilisimatuup oqarnera naapertorlugu angerlarsimaffeqanngitsunut suliassarujussuunngitsunik aallartittoqarsinnaavoq

- Katersortarfiit oqaluffiilluunniit unnuiffissatut ammarsinnaasariaqarpagut. Madrassinik tunillugit natermi sinissinnaaniassammata, Arnfjord oqarpoq.

Aaja Chemnitz Larsenip  isumakuluutigaa, Kalaallit Nunaani inuttut ajornartorsiortut  naammattunik ikiorneqannginnertik pillugu  Kalaallit Nunaanniit aallartariaqartarnerat.

Inuttut ajornartorsiortut nunatsinnilu naammattunik ikiorneqanngitsut Danmarkimut nuttariaqartut amerliartornerat Steven Arnfjordip uppernarsarpaa.

- Danmarkimut nuuttarput tappavani aningaasanik amerlanerusunik ikiuutisisaramik, atornerluisuugunik katsorsarneqarsinnaapput tarnimikkulluunnit nappaateqarunik ikiorneqarsinnaallutik.  
Naalakkersuisunikkut attumassuteqanngitsut arlaqartut angerlarsimaffeqanngitsunut ikiuunnissamut neqerooruteqartarput, taamaattullu Kalaallit Nuananni amigaatigaagut.

Arnfjordip naliliinermini, angerlarsimaffeqanngitsunut ajornartorsiuteqarneq  ukiuni kingullerni annertusiartortoq oqaatigaa.

- Naliliininni amerliartorput. Danmarkimi naalakkersuisunikkut attuumassuteqanngitsunik suliaqartut,  innuttaasunik kalaallit Nunaanni naamattumik ikiorneqannginnertik pissutigalugu Danmarkimut nuuttunik sullissisartunik oqaloqateqartarnitsinnit tamanna naliliineruvoq,- aamma maanni Kalaallit Nunaanni nammineq piumassutsiminnik angerlarsimaffeqanngitsunik  suliaqartut oqaloqatigigaangatsigit, oqaluttuarisarpaat angerlarsimaffeqanngitsunut nerisitsisarfinni neriartortartut amerliartortut, Arnfjord oqarpoq.

Ilisimatuup oqanera naapertorlugu  kisitsisoqarnissaa pisariaqarpoq  minnerunngitsumillu angerlarsimaffeqanngitsut ikiorneqarneqartariaqarput

 



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl