Angela Merkelip kissaatini annerpaaq immaqa angussavaa

Naalagaaffiit G8-mik taaneqartartut, tassa naalagaaffiit nunarsuatsinni pisuunerpaat arfineq-pingasut, Tysklandimi ataatsimeersuarput, qaaqqusisullu, tyskit kansleriata, Angela Merkel-ip, kissaatigisani pingaaruteqarluinnartoq immaqa eqquutsissinnaavaa, aviisi Politiken taama allaaserisaqarpoq.

USA-p præsidentia, George W. Bush, Tuluit Nunaannilu ministeriuneq, Tony Blair, ullumikkut ataatsimeereerlutik oqarput, gassinik silaannarmik kissakkiartortitsisartunik annikillisaanisarput G8-mi pisortat isumaqatigiissutigigaat.

- Ilimagaara gassinik silaannarmik kissakkiartortitsisunik aniatitsinerup annikillisarneqarnissaat tamatta isumaqatigiissutigileripput, aamma ilimagaara tamatuma anguniarneranut suliut ajunngitsoq anguleripput, Tony Blair, nutaarsiassaqartitsivik Reuters malillugu, oqarpoq.

Tony Blair-ip taama oqarnerani George W. Bush saninnguaniippoq, nutaarsiassaqartitsivillu Reuters naapertorlugu Bush aamma aalajangersimarpalulluinnarpoq.

- Tamanna anguniagaq tamatta pimoorulluinnarparput, USA aamma peqataalluinnarumavoq, Kyoto-mimi isumaqatigiissut 2012-imi naasussaavoq.