Angela Merkelip Kalaallit Nunaanniinnera illuatungiliuttut iluarinngilaat
Angela Merkelip Kalaallit Nunaannut tikeraarnera Tysklandimi illuatungiliuttunit iluarineqanngeqaaq, nutaarsiassaqartitsivik Ritzau naapertorlugu tassaalluni ”pr-stunt”, takoqqusaarneq.
aggustip 16-at 2007 06:17
- Angalaneq taanna asuli angalaneruvoq, illuatungiliuttut De Grønne-t siulittaasuat, Reinhard Bütikofer, oqarpoq.
Reinhard Bütikofer FDP, liberaliusut, siulittaasuannit, Guido Westerwellemit taperserneqarpoq, Angela Merkelip Kalaallit Nunaannut tikeraarnera assiliisunut iluarusutsitsiinnassammat.
Naalakkersuisulli tamanna ilumuunnginnerarpaat. Nutaarsiassaqartitsivik Ritzau naapertorlugu naalakkersuisut oqarput, iluliarsuarnik takunissi Merkelip qilanaareqigaa.
Merkel avatangiisinut ministerimit, Sigmar Gabrielimit ingiallorneqarpoq. Taanna tassaavoq nanuaqqamut tusaamasaaqisumut Knutimut tapertaasoq.
