Angela Merkel aasaru nunatsinnukalerpoq
Tysklandip kansleria Angela Merkel nunatsinnut aasaru tikeraassaaq.
Naalakkersuisut siulittaasuata Hans Enoksenip aamma ministeriunerup Anders Fogh Rasmussenip ippassaq tyskit naalakkersuinikkut qullersaannut qaaqqusissut atsiorpaat.
Tysklandip massakkut EU-p siulittaasuutitaqarfia tigummivaat. Kisianni tikeraarneq pissaaq siulittaasuutitaqarfik tigummiunnaareerpassuk, tassami pilersaarutaavoq aggustip 16-anni aamma 17-anni tikeraassasoq, Namminersornerullutik Oqartussat allaffeqarfianni pisortaaneq Kaj Kleist ilisimatitsivoq.
Angela Merkelip aasamut nunatsinnut tikeraarnissaata saniatigut aasaru EU-kommissionip siulittaasua José Manuel Baroso tikeraassaaq. Taanna juunip naalernerani tikissaaq Naalagaaffeqatigiit siuttuisa ataatsimiinnerisa, ukiormanna nunatsinni ingerlanneqartussap, kinguninnguatigut.
