Angallatit containerillu nooqquneqartut
Nuuk Imerup eqqaani containerinut iniissivimmi, Qasigiannguit timaani angallatinut inissiivimmi imaluunniit naluttarfiup Maliup eqqaani inissiivimmi angallammik containerimilluunniit uninngasuuteqaruit, taava tamakkua Qinngorpumut aasap ingerlanerani nuussavatit.
Kommuneqarfik Sermersooq tusagassiuutinut taama nalunaaruteqarpoq.
Nunaminertat inissiiviusut taakkua pingasut suliffeqarfinnik inissianillu sanaartornernut atorneqassammata inissiivigineqarunnaassapput.
Kommunillu erseqqissaatigaa containerit angallatillu aggustip ulluisa 15-ianni 2017-imi nuunneqareersimanngitsut, piginnittut akiligaannik kommunimit nuunneqassasut.
Piginnittulli Qinngorpumi nunaminertamik tunineqarsimagunik angallatitik containeriutitillu naamminneerlutik juulip ulluisa qulinganiit nuussinnaalissavaat 2019-illu naalernerata tungaanut tassaniissinnaassallutik.
Pigisat allat, soorlu assersuutigalugit biilit, maskiinat kilisaatinullu atortut inissiiffiugallartussamut inissinneqaqqusaanngitsut, Kommuneqarfik Sermersooq naggasiivoq.
