Angallatinik isumannaalisaanikkut akuerineqarsimasunik angallateqartarlik
Qeqertarsuup eqqaani angallannikkut aaqqissuinerup allanngortinneqarnerata kingorna, angallateeqqat inunnik angallassisartunngortissimavai. Kommunillu Suliffeqarfinnut atorfilittaata angallatit inunnik angallassiniartut Naalagaaffimmit Immakkut Angallannermut Isumannaallisaanissamut Nakkutilliisoqarfianit akuersissummik peqqaartariaqarnerannut piumaqarnerata kingorna aalassassimaarneqalerpoq. Kommunimiillu suliffeqarfinnut atorfilittaanik kommunaldirektørimillu isornartorsiuinermik tamanna kinguneqarsimavoq. Pisut tamakku pissutigalugit kommunalbestyrelsi aqagu imikkut ataatsimiittussanngorpoq. IA-meersoq Ani Dahl Siumumiillu ilaasortat kommunalbestyrelsimi ilaasortat atorfillillu atorfimminut tunngatillugu angalasaarnerannut tunngasumik malittarisassaqalernissaq aqagu siunnersuutigissamaarpaat.
-Sulinermik avataatigut inuit qanoq angalanissaat uagut akuliuffigisinnaanngilarput, tamakku Naalagaaffiup Immakkut Angalasunik Isumannaallisaanermut pisortaqarfiata politiillu suliassaraat. Isumanaallisaanissamut tunngatillugu angallatillit ilaanaat nalunaarfigineqaratik, tamarmilli nalunaarfigineqartariaqarput, allaffigineqarsimasummi tallimat saniatigut allat aamma ilaasoqarlutik angalasarmata. Angallatillit inunnik angallassisarnerat nalinginnaasorujussuuvoq, soorlu Aasiannukarniarutta angallatip orsussaanut akileeqataaginnarluta ilaasinnaagutta akikinneerarsuummat taamaaliortarutta ajortoqarsorinngilara, Anni Dahl oqarpoq.
Kommunaldirektørip kommunimilu inuussutissarsiornermut pisortap – inatsimmik malitsiarnerat pissutigiinnarlugu - Qeqertarsuarmi kommunalbestyrelsemit ”eqqartuunniarneqarnerat” Demokraatit isumaqatiginngilluinnarpaat.
-Attartortoq aamma pisussaavoq malittarisassat malissallugit, Jens B. Frederiksen allappoq.
-Qanormi amerlatigisut immami ukiumut ajunaartarpat, sillimaniarneq piviusumik ingerlanneqanngimmat?
- Umiatsiaq akuerisaanngitsoq ilaasunik angallassigaangat, pissusissamisuunngitsumik unammillerneruvoq angallatinut hundredetusindtit arlerlugit aningaasartuuteqarlutik angallassisinnaanissaminnut Imarsiornermi Qullersaqarfiup piumasaanut malinninniartunut, Demokraatit allapput.
