Angallassinissamik tunngasunik ikiorsiisoqarsinnaanngitsoq

Kommunerujussuit 2009–p kingorna pilersinneqareerpata nunap immikkoortuani kommunerujussuarmi najukkami, ilaasunik assartuinermik ingerlatsisoqarsinnaalissaaq.

Kommunit arlallit aqqusaarlugit ilaasunik angallassineq Namminersornerullutik Oqartussanit ullumikkut akisussaaffigineqarpoq, KANUKOKA-p pisortaanera Martha Labansen, Nanortallip, Qaqortup Narsallu Kommuniisa kissaataannut akissuteqarluni apriili-mi taama allappoq.

Januaarip aallaqqaataani 2006–imi ataatsimik sammiveqarluni ilaasunik angallassisoqalernerata ajorseriarnera iluarsiiviginiarlugu, KANUKOKA ikiorseeqqullugu kommunit taakku pingasut qinnuvigigaluarpaat.

Martha Labansen aamma allappoq, januaarip allaqqaataa 2011 tikillugu Air Greenland-ip ullumikkutut ilaasunik angallassinissaanik Namminersornerullutik Oqartussat isumaqatigiissuteqarsimasut, taamaattumik taqqavani allatut angallassinissamik tunngasunik ikiorsiisoqarsinnaanngitsoq aammalu namminersortunut kommunit tapiissuteqarsinnaanngitsut.