Immikkoortortaqarfik: Angallassineq pitsaanerulissaaq

- Tikinniartilluta piffigisatsinnut imaluunniit aallarniartilluta, Air Greenland Disko Linelu ataqatigiittumik aaqqissuineq ajornerat kingorna, unnuisariaqartarnerit, ulluni arlaqartuni allaat, misigisarpagut, Qaasuitsup Kommuniani kommunalbestyrelsimut ilaasortaq Siumumeersorlu Kristian Jeremiassen oqarpoq.

Kommune Kujalliup isumaqatigiissut aamma iluarinngilaa.

- Maanna taamatoqqissaaq inissinneqaqqippugut, tassa kommune, innuttaasut minnerunngitsumillu kommunimi inuussutissarsiornermik ingerlataqartut angallannikkut ajornerusumik inissinneqartussanngorlugit isumaqatigiissuteqartoqarluni. 

Borgmesteri Jørgen Wæver Johansen inuussutissarsiornermullu ataatsimiititaliami siulittaasoq Simon Simonsen tusagassiuutinut nalunaarummi taama allapput.

Kisianni Kujataani Qeqertaarsuullu Tunuani angalasut kiffartuunneqarnerat pitsaanerulilersoq, attaveqaqatigiinnermut immikkoortortaqarfimmi pisortaq Andreas Østbirk isumaqarpoq.

- Kujataaniunerusoq kisianni aamma ilaatigut Qeqertarsuup Tunuani arlariinnik angallasseriaaseqalernikkut 
ilaasut amerlanerusut apuuffissaminnut piffissaq eqqorlugu apuuttalissasut, taamaalillutillu ingerlaqqinnissaminnut aporfikinnerussasut isumaqarpugut, Andreas Østbirk oqarpoq.

Taanna naapertorlugu Disko Line Air Greenlandip Qeqertarsuup Tunuani maanna angallavigisartagaa malillugu angallassisalissaaq.

Aamma Disko Linep Kujataani silaannakkut angallassineq isumagisassavaa.

- Aaqqissuussamik angallavioreersut aqqutigineqartassapput, taakkua takoreerpagut pisariaqartitamillu naammassinnissinnaasoraarput, Andreas Østbirk oqarpoq, erseqqissaatigalugulu Kujataani nunaqarfinneersut umiarsuarmik angallanneqartassasut, silarlukkaangallu helikopterimik angallanneqartassasut.