Angallannikkut pissutsit aaqqittariaqarsoraat

Kalaallit Nunaata avannaani angallannikkut pissutsit politikerinit aaqqiiviginissaat salliutinneqartariaqarpoq – nunami maani takornariaqarneq aningaasatigut isertitsissutaassappat.

Taamaattumik takornariaqarnikkut suleqatigiiffik Destination Disko naalakkersuisunut allagaqarpoq naalakkersuisut avannaani angallanikkut pissutsit isummerfiginiassamatigit, Destination Disko-mi pisortaq, Klaus Berg taama nassuiaavoq.

- Nuummi Ilulissanilu mittarfiit tallineqarnissaat ullumikkut isummerfigineqartussanngorpoq, Takornariallu tamaasa inissaqartikkumallugit avannaani agguataartariaqarpagut, kisiannili qanoq ilillugit aallartissavagut?, Destination Diskomi pisortaq Klaus Berg aperivoq nangipporlu:

- Aammattaaq nunat avannarliit-killiit takornariaqarneq pillugu saqqummersitsineranni tusarparput takornarianik Kalaallit Nunaata avannaanukartitsiniartarneq ajornartorsiutaasoq ornitassaqarniarneq ajornartorsiutaasarmat.

Taamaattumik takornariat angallanneqarsinnaaniassammata, misissoqqugaluarpavut timmisartunut 19-it angullugit ilaasoqarsinnaasunik mittarfinnik naatsunik pilersitsisinnaaneq misissoqqullugu, taamalu ajornartorsiutitsinnik aaqqiilluta, Klaus Berg oqarpoq.

- Eqqarsaataavortaaq mittarfiit naatsut Uummannami, Qeqertarsuarmi Qasigiannguanilu pilersinneqarsinnaasut.

Aammattaaq aningaasartassai misissortikkusupavut, nalunnginnatsigit kiffartuussinermi akit aamma aqqutini amigartoorfiusuni akit, minnerungitsumillu sumiiffinni pineqartuni aningaasarsiornikkut qanoq sunniuteqarnissaat pillugit, oqarpoq nangipporlu:

Ullumikkut taama allagaqarpugut pissutigalugu Nuummi Ilulissanilu mittarfeqarfiit tallineqarnissaat aalajangiivigineqarnialermata, taamatuttaaq nalunnginnatsigu sumiiffinni mittarfiit naatsut titartarneqareerlutik sanaartorneqarnissaat aallarteriaannaasut, Klaus Berg naggasiivoq.