Angallannermut inatsisit nutaat biilertut eqqaamajuminaatsippaat

Biilertut ilaat ullaa-tungaani oqaluuppavut.

- Qasseriarlunga puigussanerpara kisiannimi takussavarput.

- Mobili sianeraluarpat qanoq iliussavit?

- Asukiaq, ammariarlugu takussavara suminngaanniit sianernersoq, taava unikkuma sianerfigiumaarpara, Hans Lars Jørgensen oqarpoq.

Aammattaaq Hans Alaufesenip angallannermut inatsisip atuutilernera nalunngilaa eqqaamallugulu:

- Malinniarsarivara, aamma eqqaamajuminarpoq. Takusinnaasakka malillugit biilertut allat maleqqusat maligunnaareersimavaat.

- Soorunami sungiunniaqqaartussaassavara. Neriuppunga iluaqutaassasoq, Elma Sikemsen oqarpoq.

Biilertilluni isumannaallisaanermi qitequtaasaq atunngikkaanni, mobililu tigullugu oqaluussinermi 500 koruunik akiliisitaanermik kinguneqarsinnaapput, aamma biilertilluni qulliit ikumatinngikkaani 500 koruuninik akiliisitsinermik kinguneqarsinnaavoq.

Imigassamik aalakoornartulimmik annikinnerpaamik 0,5 promillinik annertussusilimmik imersimatilluni biilimik ingerlatitsigaanni akiliisitaanermik biilersinnaanermullu allagartaajagaanermik kinguneqaarsinnaapput.

Jaaku Lyberth ilanngutassiamik suliarinnippoq.