Angallanneq pitsanngorsaanissaq uatsi

Naalakkersuisut angallannermut aningaasaliissut ilaqqinnissaannut piffissaasorinngilaat, akissumminnilu ilaatigut allapput, kiffartuunneqarnissamik isumaqatigiissutit 2010-p naanerata tungaanut atuuttussaasut, sumiiffimmi angallasseriaatsimut ataasiinnarmut tapiissuteqarnissaq tunngavigalugu akuerineqartut.

- Angallasseriaatsimut allamut tapiisoqassappat, ilaasutigut tunngaviusut allanngussapput, taamaalillunilu isumaqatigiissuteqarnermi tunngaviusoq allannguuteqassaalluni, Naalakkersuisut allapput.

SIK-ip siulittasua, Jess G. Berthelsen, pingaartippaa, ilaasortamik sumiiffimmiit sumiiffimmut nikissinnaanissaat.

- Aqqusineqanngilagut, taamaattumik isumaqarpunga, Naalakkersuisut immakkut silaannakkulluunniit aqqusiuutissalluta pisussaaffeqartut. Taava 100 millioni imaluunniit 150 millioni koruuninik aningaasaliiniarpata, tamanna pissusinnamisuuinnarpoq.

Arctic Umiaq Line-p pisortaa, Jette Larsen, oqarpoq, Sarfak Ittuk ullumikkut uninngaffeqarpiarnani atorluarneqartoq.

- Siorna amigartooruteqarpugut, ukioq manna amigartooruteqassaagut aamma ukiup tulliani taamannak. Namminersornerullutik Oqartussat amigartoornissamut qulakkeerusiillutik ukiut tamaasa 5 millioni koruuninik immikkoortitsisariaqartarput. Arctic Umiaq Line umiarsuarmik nutaamik sanatitsinissaminut piareersimanngilaq.

- Umiarsuarnik pitsaanersunik amerlanerusunillu pisariaqartitsillutik, atuisut oqalummata paasilluarsinnaavara. Kisianni arlaaninngaanniit taanna akilerneqartariaqarpoq. Atuisut akiliissappat, imaluunniit politikikkut aaqqiisoqassava? Imaluunniit Nunatta aningaasaatai allatigut atorluarneqarnerusinnaappat? Isumaqarpunga eqqarsarluaqqaarluni nalilersuisoqartariaqartoq, Arctic Umiaq Line-p pisortaa, Jette Larsen oqarpoq.