Angallanneq partiinut ukiaru isumaqatigiinniutigineqassaaq

Angallannerup aaqqivigineqarnissaa, Siumut aasaq ataatsimeersuarmat ataatsimeersuaqataasunit kissaatigineqarpoq. Siumut Naalakkersuisullu Siulittaasuat Hans Enoksen Ataatsimmeersuarnermi oqarpoq angallannermik aaqqissuusseqqinnissaq eqqarsaatigalugu partiinut allanut ukiaru isumaqatigiinniaqateqassallutik.

Inatsisartuni ilaasortaq Atassummeersoq Godmand Rasmussen Ulloqeqqaaanerani radioavisimi oqarpoq Aappaagu Aningaasanut Inatsisissatut siunnersuummi angallannermut tapiissutissatut siunnersuutigineqartut 10,9 million koruuniusut naammanngitsut, piumasaqaatinut tamakkiisumik iluarsiinerusussaanngimmata. Tassungalu Naalakkersuisut Siulittaasuat Hans Enoksen akissuteqarpoq, erseqqissaatigalugulu Aappaagumut Aningaasanut Inatsisissatut siunnersuut, Siumut ataatsimeersuarnera sioqqullugu aasaq junimili naqiterneqarsimasoq.

- Junimili naqiterneqartarpoq, kisianni Inatsisartut ukiaru ataatsimiilerpata sinersortaatitigut timmisartukkullu angallanneq partiinut tamanut isumaqatigiinniutigineqassaaq, aningaasallu sumit aaneqarnissaat eqqartoqqissavarput, Enoksen oqarpoq.

Godmand Rasmussenip aningaasat angallannermut atorneqarsinnaasutut oqaatigisai pituttoriigaangamik atorneqarsinnaanngitsut Hans Enoksen oqarpoq.

- Ukiumut ataasiinnarmut aaqqiisoqarsinnaanngilaq, angallanneq aaqqissuuteqqinneqassappat aningaasat ataavartumik aaqqinneqartariaqassaput, imaanngitsoq atunngitsuugaqarnerput aallaavigalugu ukiumiit ukiumut aaqqiisaqattaarniassasugut Hans Enoksen oqarpoq.

Aningaasanut Inatsisissatut siunnersuummut naalakkersuisooqatigiit, tassalu Siumut Atassullu tamarmiullutik tunuliaqutaasut Naalakkersuisut Siulittaasuata erseqqissaatigaa.