Angallanneq Agathe Fontainilu
Angallanneq pillugu inatsisartuni ullumi oqallinnissaq angallanneq pillugu ataatsimiititaliap siulittaasuata, Agathe Fontainip, neriuutigaa silatusaarluni oqallinnerujumaartoq nalorninarunnaarlugu suna siunniunneqassanersoq.
Aamma kissaatiginnginnerarpaa immikkuualuttut uninngavigineqassanngitsut, soorlu umiarsuit qassinut sumut tikittassasut, tamakku atorfilittat isumagisussaammatigit. Namminerlu nuna tamakkerlugu politikeritut nunamullu tamarmut sunniuteqartussat maluginiartussaagamigit Nuup mittarfeqarfiata 1799 meterinngortinnissaanik isuma nuna tamakkerlugu aaqqissuussinissamut qanoq sunniuteqassanersoq paasilluaqqaartariaqarnerarpaa, tassami Nuup kommuneata misissuisitsisimanera isornartoqartinneqarpoq, taamalu Agathe Fontain, IA, isumaqarpoq Nuup kommuneata mittarfimmik talliliinissamik misissuisitsisimanera arlaannaannulluunniit attuumassuteqanngitsumit misilinneqartariaqartoq assigiinngitsunit nangaassutigineqartut qularnarunnaarsillugit.
