Angalatuut annaanneqarput
Ilisimatuup, Leif Toudal Pedersenip, Københavnip ilaani Østerbromi, allaffimmini eqqissilluni issiarusaajutigaluni, Kalaallit Nunaata Kitaani isseqisumi misigisassarsiorlutik angalasut inuunerat annaassimagunarpaa.
Danmarkimi silaannarsuarmik misissuiffimmi, Danmarkimi Tekniske Universitetimi, lektorip, misigisassarsiortut aqqutaat allanngortippaa, paasigamiuk, immap sikuata, ilimaginngisamik aserortilersimasup, tungaanut nalusaminnik taakku ingerlasut.
- Satellitikkut assilisat, Europami Envisat-imit assilineqarsimasut, isiginnaartillugit, malugilerpara, angalasut sikup saattuaqqap imartarasaartup tungaanut ingerlasut, lektori, Leif Toudal Pedersen tusagassiuutinut nalunaarummini oqaluttuarpoq.
Leif Toudal Pedersen nunani issittuni immap sikuanik nakkutiginnittuuvoq, issittumi ilisimasassarsiortunut siunnersuisartuulluni.
Belgiamiut Alain Hubertip aamma Dixie Dansercoerip misigisassarsiorlutik angalanerannut akisussaasuusup, International Polar Foundationip, angalasut navianartorsiulissasut paseriaramikkik, aqqutaat allanngortinniarsaraa.
- Sikup ingerlaarnera alapernaalerparput, angalasullu sikumut aalaakkaasumut aqqutissarsiuullugit, Leif Toudal nassuiaavoq.
Alain Hubert Dixie Dancercoerilu manna navianartorsiorunnaarput. Kalaallit Nunaata sineriaanut anngunnissaminnut kilometerit 50-it maanna amigaatigaat.
Angutit taakku Siberiap nunavittaa marsip ulluisa aallaqqaataanni qimappaat, Qalasersuaq aqqusaarlugu sikukkoorlutik Kalaallit Nunaannukarniarlutik. Ingerlaarnerat 2.000 kilometerit missaanniittussaavoq.
