Angalatoorsuaq Carl Petersen atuakkiarineqarpoq
Angalatoorsuaq pillugu atuakkiaq 400-t sinnerlugit qupperneqartoq angut qallunaaq Carl Petersen 1800-kkunnili issittumi ilisimasassarsiortarsimasoq pillugu, aamma Kalaallit Nunaanni issittumilu taamani inuuneq pillugu oqaluttuanik ulikkaarpoq. Atuakkiortuuvoq oqaluttuarisaanermik ilisimatusarsimasoq Niels Aage Jensen, atuakkiornerminut atatillugu paasiniaangaatsiarsimasoq.
Qale - kalaallimmi Carl Petersen Qeqertarsuarmiitilluni kalaallimik Berthinguamik taagukkamik Ida-Berthe-milli kuissuteqartumik nuliarpoq. Kingorna Berthinguaq Danmarkimut avalaqatigaa, tappavani juumuutut atuassammat. Juumuunngoreermat kingorna Upernavimmi nunassipput. Aappariillu inuunerat, pingaartumillu Qalep issittumi angalatoorsuartut misilittagarpassui, navialisarnerit, naggueqatigiinnik inunnik naapitsisarneri allarpassuillu pisartut uummaarissumik oqaasertalersorlugu atuakkiarineqarsimavoq.
Misilittagarpassui angalatoorsuit allat, soorlu kinguaariit tulliusut ilaat Knud Rasmussenip Peter Freuchenillu kingorna tusaamasarsuanngortut misilittagaannut inornerunngillat.
Carl - Polarfarer qallunaatut oqaasertaqarpoq atuakkiorfimmit Forlaget Sohnimit septembarip ulluisa qulingani saqqummersinneqassalluni.
