Angalatitsivinnut utoqqatserpoq
Kukkusimagaanni kukkuneq nassuerutigisinnaasariaqarpoq, taamaaliorpullu Takornariaqarnermi Inuussutissarsiornermilu siunnersuisoqatigiit Air Greenlandimut kukkusimanertik utoqqatsissutigimmassuk.
Timmisartuutileqatigiiffik pisuutinneqaraluarpoq angalanissamut pilersaarut aappaagumoortoq suliarisimanngikkaa, taamaattoqanngilarli, taama nassuerpoq Takornariaqarnermi Inuussutissarsiornermilu siunnersuisoqatigiit pisortaat Stig Rømer Winther.
- Air Greenland pisuutippallaartoorsinnaavarput, uanili pineqartumi oqartariaqarpunga uanga sukkavallaamik periarsimallunga, tamannalu ajuusaarutigaara, Stig Rømer Winther oqarpoq.
Vestnorden Travel Martimi takornariaqarnermut ussassaarisoqarnerata nalaani Stig Rømer Winther radio aviisimut oqarpoq, takornariartitsisartuulluni angalanissamut pilersaarutit 2006-imoortut nutaat angalatitsiviit suli isumagisimanngimmassuk isoralugu.
Tamannali eqqunngilaq, tassami Air Greenlandip angalanissamut pilersaarutiliani nittarsaatereersimavaa, angalatitsiviup pisortaa Flemming Knudsen tusagassiutinut nalunaaruteqarpoq.
