Angalatitsivik Titanicimut takornariartitsalerniartoq
Umiarsuarsuummi 1912-imi kivisup inuillu 1.490-it 1.635-illu akornanniittut ajunaarutigisaannut takuniaaneq 105.129 dollarinik akeqarpoq, tassalu 728.000 koruunit missaannik, aningaasallu naleerukkiartornerat malillugu Titanicip angalaqqaarnerani billetsip akisunerup akeqqatigikannissavaa.
Angalaneq ullunik arfineq-pingasunik sivisussuseqassaaq Canadamilu New Foundlandimit aallartissalluni. Angalasussat tassanngaanniit timmisartumik umiarsuarmut ilisimatuunut takornarianullu aallaavittut atorneqartumut ikaanneqassapput.
Ilaasussallu umiarsuarmiinneq sungiunniaqqaassavaat ullullu pingajuata arferngatalu akornanni attartartoq immikkut sanaaq inunnillu pingasunik ilaasoqarsinnaasoq atorlugu meterinik 4.000-ingajannik itissusilimmut Titanic takusassavaat, Finans.dk taama allaaserisaqarpoq.
