Angajora naamaarnermik toqquteqarpoq
Gabrielle Gabrielsen angajuminik annaasaqarnermi kingorna inuusuttunut kaammattuerusuppoq naamaarnialertinnatik eqqarsarluaqqullugit.
- Naamaarniartut imminnut aperisariaqalerput, naamaarnerup kingunipilugisinnaasai ilaquttanut qanoq artukkiisinnaatiginersut, assersuutigiinnarlugu angajoqqaat qanoq iliussappat naamaarnerup kingunerisaanik ajoqusertoqarsimassappat imaluunniit toqusoqarsimassappat, Gabrielle Gabrielsen oqarpoq.
Gabrielle Gabrielsen 1999-mi angajuminik 19-nik ukiulimmik naamaartilluni ajunaartumik annaasaqarpoq, kingunerisaanillu naamaarneq eqqaaneqaannaraangat tupattarpoq.
- Ajortorujussuuvoq tupannarujussuullunilu angajuga annaagatsigu. Angajugami taamanikkut inuutsaruttorluni naamaarnermigut toqquteqarpoq, isumaqanngisaannarsimagaluarpunga angajuga taamak inuusutsigisumik annaajumaaripput, misigisaq ajortorujussuullunilu qaangeruminaassimaqaaq, Gabrielle Gabrielsen oqaluttuarpoq.
Ulluni makkunani naamaarniarnerit tusagassiutitigut tusarsaaqqilermata, Gabrielle Gabrielsen angajuminik pisumik eqqaasinneqarluni tusagassiutinut qisuariaateqarpoq.
- Inuusuttut naamaartarnerat tusaasaleqqillugu assut najummatsernarpoq. Tassami arlalippassuarnik soraluaqarlunga jorngoqarama taakkua naamaarniarnissamut ussernartorsiorsinnaanerat ernummatsigaara. Tassami inuusuttut amerlanerit naamaarnerup toqqutaasinnaanera eqqarsaatiginagu naamaarniartarput, arlaatigullu toqqutaassappat ilaqutariinnut tamanna eqquinerluttussaavoq, Gabrielle Gabrielsen oqarpoq.
