Angajoqqaatik qimallugit atuartariaqartarput
Uanga ateqarpunga Kiistaaraq, Igalikuminngaanneerpunga, 13-inik ukioqarpunga,
Qaqugu Igalikuliaqqissavit? Tallimanngornermiissaaq, kisianni sikuugami qanoq issanerpoq, immaqa aatsaat juullimut.
Angerlarserpit?
Naa.
Meeraqarpiannginnami?
Ja, ataasiinnaavoq. Nunaqarfimmi maani amerlanerugamik, Igaliku ilinniartitsisussaaleqigami. Maani skolehjemmemi tallimaavugut. Uagut Aabilu Igalikuminngaanneerpugut, taava Larsi Inneruulaminngaanniit, Avijaja Asiarpalu Qorlortumit,
Kiistaaraq Egede oqarpoq, taanna aqqalussanilu Aabi, aqqanilinnik ukiulik, Qassiarsummut atuariartortariaqarsimapput.
Qassiarsummi skolehjemmi 1963-imili atulerpoq, atuartunit 16-init ullumikkut najugaqarfigineqarsinnaasoq.
Savaatillit meerartaasa ilaasa sungiusimavaat atualerlutillu angajoqqaatik qimallugit atuariartortariaqartarnertik.
Aamma Qaqortup Narsallu pigisaani savaateqarfinni Qeqertaasamiittuni, meeqqat katillutik aqqanillit savaateqarfinni assigiinngitsuni atuartinneqarput. Savaateqarfiit sanileriit ilaat imminnut ikioqatigiittarput, meerartaasullu ilaat saniliminnut atuariartortarput.
-Ilaat angajoqqaavisa atuartittarpaat, ilaat uannut tuluttooriartarput ilaali aamma ilinniartitsisumik ilinniarsimasumik savaatillip nuliaasumit atuartinneqartarput, taama oqarpoq faglærer Arnaq Motzfeldt, Qaqortup pigisaani Timerlermiu.
Qeqertaasarmiut Peqatigiiffiani siulittaasoq Magnus Hansen oqarpoq, Qeqertaasami atuarfittaarnissamik isuma nipangiunneqarsimammat siulersuisut ataatsimiilerpata qaqeqqinniarlugu.
