Angajoqqaat moské-p silataani utaqqerrapput

Angajoqqaat amerlasuut Moske-p appalaartup Pakistanip illoqarfiisa pingaanersaani Islamabad-imiittup tiguarneqarsimasup silataani utaqqerrapput.

Pakistanip præsidentiata Pervez Musharraf-ip politiit immikkut sungiusakkat utaqqeqqusimavaat, meeqqat moske-t illutaannit anisinnaaniassammata.

Moské aappalaartoq ataatsimoortillugit illuliaavoq angisooq, ilaatigut niviarsiaqqanut atuarfeqarluni, nukappiaqqanut atuarfeqarluni seminariaqarlunilu. Moské-uvoq malunnaatilik, islamisiortut ingasaassiniartartut Moské aappalaartormiut muslimit ingasaassiniartartut pingaartitaat pillugit saarliullutik sorsuutiginnittuartarsimapput. Muslimit Danmark-imut muamaammik titartakkat pillugit ajorinnilermata saarliusimapput, massakkullu saarliullutik Pakistanip upperisarsiutaanngitsumik præsidentianut, USA-mut peqqarniisaarnianullu sorsuutiginninnermut tapersersuisumut, akerliullutik. Taakku sharia-mik Pakistan-imi atuuttussanik inatsisiliortoqarnissaa piumasaraat.

Sivisuumik akersuutereerput, aallarussinernik toqutsinernillu kinguneqartunik, sapaatip-akunneratali aallartinnerani naalakkersuisut naammaginnilerput, Moské unngerutissiamik kapinartulimmik qamutinillu sorsuutinik unguvaat, politiillu immikkut sungiusakkat isaatillugit. Akersuuttoqalerporlu, massakkumut inuit 19-it toqoreerput.

Ilinniartut 100-ut arlallit ullut kingulliit tunniutiinnareerput, sulili 400-ut missaat tunniutiinnarusunnatik, taakkulu akornaniipput meeqqat, niviarsiaqqat nukappiaqqallu. Pakistan-ip præsidentia Pervez Musharraf ullaaq manna politiit immikkut sungiusakkat utaqqigallaqquai, arnat suli Moske-miittut aniniassammata, meeqqallu angajoqqaavisa meeqqatik aaniassammatigit. Tamanna pereerpat susoqassanersoq suli nalunarpoq. Muslimit palasiat ataaseq suli Moské-miittooq oqarsimavoq illersortinilu tunniutiinnarsinnaallutik, anigunik tigusarineqassanngikkunik, naalakkersuisulli tamanna akuerinngilaat.