Angajoqqaat meeqqerivimmiittuutilliit ajuusaarput

Kommuneqarfik Sermersuup meeqqeriveqarnermik allanngortitsinissaanut tunngatillugu meeqqanik perorsaanermik suliallit, kommunimi pilersaarusiortut, kattuffimmillu ilisimasaqartut Radioaviisimit oqaaseqartereeratsigit meeqqerivimmi angajoqqaaq perorsaasullu allannguinissap kingunissaa pillugu akuersaannginneri paasivarput.

Sara Josefsen Nuup illoqarfiani blokit ilaanni meeqqerivimmi Sisimi panimminik pingasunik ukiulimmik meeqqerivimmiittuutilik,Kommuneqarfik Sermersuup meeqqeriveqarnikkut pissutsinik nutarsaaniarnermigut meeqqeriviit ningiuisa meeqqerivinnik tallimanik aqutsisalernissaat orniginartinngilaa.

- Soorunami Kommunip aaqqissuusseqqinnerani perorsaasut immikkoortortaqarfimmi aqutsisut nooqattaalernissaat angajoqqaajulluni eqqissisimananngilaq, taama meeqqerivinni sulisut paarlakaatereertigisut aqutsisunik piffissami aalajangersimasumi meeqqerivimmiittoqartarun- naarnissaa aamma meeqqamut toqqissisimananngilaq, aamma meeqqat sulisunut tunniunnissaat angajoqqaajulluni toqqissisimanarunnaaraluttuinnassaaq, Sara Josefsen oqarpoq. Aamma oqarpoq meeqqerivimmi Sisimi sulisut nikeranngikkaluartut meeqqerivippassuarni sulisut kommunip allannguineratigut taarseraannerat akulikillisinnaasoq.

Meeqqerivimmi Sisimi perorsaasup Johanne Kristoffersenip Kommuneqarfik Sermersuumi meeqqerivimmi ningiut akisussaaffiisa amerlinissaat uparuarpaa.

- Uanga taanna akerleraara isumaqarpunga taamaaliortoqalissappat meeqqerivimmi ataatsimi perorsaasut sulinerminni suliassarpassuaqartarmata, kommunip aqqissuusseqqinniarnera piviusunngussagaluarpat meeqqat sumiginnakkat pisariaqartitaannik tuninissaannut periarfissaqarfigineqarnavianngitsut, Johanne Kristoffersen oqarpoq.

Aamma oqarpoq perorsaasut meeqqerinerminni ulapittaqimmata, piffissaq tamakkiisoq meeqqerivimmiissinnaasumik ningioqaratik suleriaaseqalissagunik meeqqanut eqqissisimanermik tunniussaqarnissaminnut piffissaqarnaviaratik.

Johanne Kristoffersen aamma oqarpoq meeqqerivimmi pisortaq aneqattaartartoq meeqqanut toqqissisimajunnaarnermik kinguneqassangatillugu.

- Meeqqerivimmi pisortaq anisaqattaassappat sulisuusunut siuariartortitsinavianngilaq, taamatut ingerlasoqalissappat meeqqat aamma toqqissisimanavianngillat, Johanne Kristoffersen oqarpoq.