Ane Lone Bagger Angajoqqaat meeqqamik ilinniarnissaannut ikorfartortariaqarpaat
Nunatsinni inuusuttut 8.511-t missaanniipput, taakkunannga 17-init 25-it tikillugit ukiullit 2800-t ilinniagaqaratillu sulifeqanngitsut naalakkersuisut kisitsisaataasa takutippaat.
Tassalu nunatta inuusuttaasa pingajorarterutaat ilinniarfimmiinnatillu suliffeqangitsuupput. Taamaanneranullu
angajoqqaat akisussaaqataalluinnartut naalakkersuisoq naqissusiivoq.
- Sunaluunniit iluatsissappat, meeqqat atuarfiuppat immaqaluunniit ilinniartitaaneruppat, GU-juppat, angajoqqaat annerusumik peqataanerisigut meeqqat ilinniartitaanerat atuarnerminnillu angusaat aamma annertunerusinnaasoq takorloorneqarsinnaavoq, ilinniartitaanermut naalakkersuisoq, Ane Lone Bagger taama oqarpoq.
Taassuma oqarnera naapertorlugu inuusuttut ingerlariaqqinneq ajortut taama amerlatiginerannut angajoqqaat kisimik pisooqataanngillat.
Tassami inuusuttut ilinniarfinnut ingerlariaqqinngitsoortarnerannut, aamma meeqqat atuarfiata tunniuttagaata killeqarnera peqqutaasoq, taanna isumaqarpoq. Taamaammat inuusuttut meeqqat atuarfiat qimatsinnagu suliat arlaannut, soorlu aalisarnermut sanasuunermulluunniit piginnaanngorsartarnissaat taassuma anguniarniarpaa.
- Meeqqat atuarfiat naammaassisassavaat 12. klassereeraangamik arlaatigut inuussutissarsiutaasinnaasunik piginnaasaqalereersimallutik, ilinniartitaanermut naalakkersuisoq, Ane Lone Bagger oqarpoq.
