Angajoqqaat kisimiillutik pilersuisut peqatigiiffittaarput
Zille Petersen arfineq-marlunnik qulingiluanillu ukiulinnik meeraqarpoq, meeqqanilu ukiut tallimat kisimeeqatigisimavai. Nuummi peqqinnissaqarfimmi immikkoortortaqarfimmi pisortaavoq, angajoqqaallu kisimiillutik pilersuisut peqatigiiffiannik pilersitseqataalluni.
- Kisimiittuuneq timikkut tarnikkullu assoroornartupilussuuvoq, tassa akunnerit 24 tiimit kisimiillutit anaanaallunilu ataataanermi nukippassuit atorneqartarput, Zille Petersen oqaluttuarpoq.
Erloqinerit ilaanni pisarput pissutigalugu naammattusaaripiloorniarsarinerit aammalu qasuersaarfissaqannginnerit pissutaallutik.
Nittartagaq paasissutissanik assigiinngitsunik imalik pilersaarutigineqartut ilagaat. Nittartakkami ilaatigut aningaasanik ileqqaarinninnissamut, igaassanut, perorsaanermut tunngasut atuarneqarsinnaassapput. Aamma peqatigiiffiup aaqqissuussaanik aallaarsimaaqatigiissinnaaneq juullilerneranilu ataatsimoornerit pilersaarutaapput.
Angajoqqaat kisimiillutik pilersuisut peqatigiiffiannit Naligiissitaanermut isumasioqatigiiffik, kiisalu Meeqqanut Inuusuttunullu paasissutissiisarfik, peqatigiiffittaamiit attavigineqareerput. Naalakkersuisut siulittaasuat, Hans Enoksen, kisimiillutik pilersuisunut atugassarititaasut pillugit allakkatigut aamma nassuiaanneqareerpoq.
