Angajoqqaat ingerlalluartut ujartorneqarput

Aallakaatitassiortussat, Mastiff TV, TV3-mut aallakaatitassaminnik suliaqarlutik aallarteruttorput, taakkua aallakaatitassianik Danmarkimi tallimanik suliaqassapput, Danmarkillu avataani allanik tallimanik aamma suliaqassallutik. Kalaallit Nunaata saniatigut aallakaatitassiortussat Danmarkimi, USA-mi, Irlandimi, Indiami Sydafrikamilu immiussinissaminnik naatsorsuuteqarput.

Aallakaatitassiat qallunaat inuusuttuaqqat perorsarnerlutat ilaqutariinnik ingerlalluartunik allanngortitsitserusuttunillu naapitsinerannik sammisaqassapput.

- Angajoqqaanik malittarisassalinnik peqqissunillu pingaartitalinnik, tamakkuninngalu malinnittunik meerartalinnik ujartuivugut, taama Mastiff TV allappoq.

Peqataaniaraanni piumasaqaataavoq ilaqutariit tamarmik inuusuttuaqqanik marlunnik sapaatip akunneranik sivisussuseqartumik tikeraarneqarnissaminnut piumassuseqarnissaat. Aallakaatitassianut immiussinerit aallakaatitassiortussat peqatigalugit isumaqatigiissutigineqassapput, ilaqutariillu inuunerannik takutitsisussaallutik. Aallakaatitassiortussat februaarimi Nunatsinni immiussinissartik naatsorsuutigaat.

Qallunaat inuusuttuaqqat ilaqutariit ulluinnarni inuuneranni ilaatinneqassapput, ilaqutariit meerartaat assigalugit nereqataasassallutik, atuarlutik, ilaqutariit suliaannut peqataasarlutik illumilu suliassanut aamma isumaginneqataasassallutik. Mastiff TV-ip inuusuttuaqqat tikeraartorinerini aningaasartuutit akilissavai.

Inuusuttuaqqanik perorsarnerlutanik tikeraartoqarnissarnut, tv-ikkullu isiginnaagassiamut peqataanissarnut soqutiginnikkuit, uunga allassinnaavutit: foraeldre@mastifftv.dk