Angajoqqaat imminnut pisuutittarput
Upernavimmi angut 47-nik ukiulik meeqqanik pingasunik kinguaassiutitigut atornerluisimasutut unnerluussutigineqarmat, angajoqqaat arlallit annikigisoornermik imminullu pisuutinnermik misigipput.
Angut 47-nik ukiulik Upernaviup politiivinit tigusarineqartoq pillaasarnermut inatsimmik unioqqutitsisimavoq, taannalu inatsit tassaavoq:
”Meeqqanut arnerisutut anguserisutulluunniit eqqartuunneqassaaq kinaluunniit 15-t inorlugit ukiulimmik atoqateqartoq”
Angut taanna siornatigut meeqqanik atornerluisimasutut unnerluussaareersimasoq, politiinit killisiorneqareerluni paasiniaaneq suli ingerlammat anisinneqarpoq.
Angutillu meeqqanik atornerluisimanera 2002-mi 2003-milu pisimavoq.
Upernavimmili meeqqanik atornerluisimanermik suliaq taannaannaanngilaq. Upernavimmi pitsaaliuinermik siunnersorti Ruth Larsen kommunip neqeroorutigisinnaasai pillugit ima nassuiaavoq:
”Nalinginnaasumik suleriaasiusarpoq, inunnik isumaginnittoqarfimmi sulisut, angajoqqaanut meeqqanullu oqaloqatiginninnissartik piareersimaffigissagaat, Ruth Larsen oqarpoq.
Taanna oqaluttuarpoq, Upernaviup kommuniani maannamut atornerluisimasut pingasut suliarineqarsimasut.
Angajoqqaat taama nalaataqarsimatillugit imminut pisuutinneq misigineqartaqisoq Ruth Larsenip nassuiaatigaa.
“Artornarnerpaasutut taaneqartarpoq, angajoqqaatut paasilluarniaraluartilluni imminut annikigiummernerujussuaq misigineqartarmat. Meerara iluamik paarisimanngilara? Angajoqqaatut arajutsisaqarsimavunga, sooruna? Tamakku apeqqutit saqqummertartut angajoqqaat oqaatigisarpaat, Ruth Larsen oqarpoq.
Meeqqat taama nalaataqarsimatillugit assigiinngitsunik ersiuteqartartut aammattaaq nassuiaatigaa. Meeqqat matoqqasunngorsinnaapput, kamassaqalerlutilluunniit, oqarpoq.
“Meeqqap tatigisaa, tassuuna suleqatiserineqarsinnaavoq, taamaassinnaanngippat inunnik isumaginnittoqarfimmut saaffiginnittoqarsinnaavoq,” Ruth Larsen oqarpoq.
Upernaviup kommuniani nunaqarfinni illoqarfimminnilu pitsaaliuineq siunertaralugu innuttaasunik ataatsimiisitsisarsimapput, Ruth Larsenilu isumaqarpoq, tamakku kingunerisaanik ammariartorneq pilersimasoq.
