Angajoqqaat imigassaq salliutimmassuk meeqqat kaattarput

Angajoqqaat aningaasaatitik imigassamut atortarmatigit meeqqat ilaat kaallutik atuariartortartut, Tasiusami atuarfiup pisortaa, Karta Korneliussen, oqarpoq kaammattuutigalugulu, atuarfinni allani nerisitsisoqartalissasoq.
Allattoq Jens Thorin
februaarip 04-at 2009 14:54

Karta Korneliussen oqaluttuarpoq, meeqqat ullut tamaasa paarnartortarnissat siunniussimagaluaritsik, paarnalli akisoqaat, assersuutigalugu iipili ataaseq 3,95 koruuneqarluni. Taarsiullugu sapaatit akunnerannut ataasiarlutik assersuutigalugu guleroditortarput iffianillu qallersukkanik ullut tamaasa pisarlutik.

- Tamanna pitsaaquteqarpoq. Atuarfimmi kajuminnerulerput eqiasuttullu takussaajunnaarput, Karta Korneliussen oqarpoq. Aperaarpullu, kaattoqartarmat nerisitsisalersimanersut?

- Suu. Tassa taquaqanngitsut malunnartaramik illiguttut, ullorlu naallugu atuarunik nukissaqassanatik. Angajoqqaat aningaasaatimik imigassamut atornissaat immaqa pingaarnerutittarpaat, meeqqatik kingulliullugit.

Taamaammat Karta Korneliussen-ip kommunit allat kaammattorpai, atuarfimmi nerisitsisarneq atuutilerseqqullugu.

- Radioavisimi oqaatigineqarpoq, angajoqqaat meeqqaminnik sumiginnaasut kaammattorneqartariaqartut. Aamma pingaarpoq, meeraq atuariartunnginnerani nerisissallugu, nerisimanngitsullu atuarfimmi nerisinneqartarnerat assut iluaqutaasutut uanga oqaatigisinnaavara, Karta Korneliussen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq