Angajoqqaat atuarfik matoqqunngilaat
Ukioq atuarfiusoq kingulleq naammassimmat, Qorsussuarmi atuartut Kalaallit Nunaanni karakteriginnersaapput, ilaatigut tamannaannarluunniit tunngavigalugu Qorsussuup matuneqannginnissaa angajoqqaat politikerinut eqqarsaatigeqquaat.
- Politikerit anguniagaraat meeqqatta sumiikkaluarunilluunniit toqqissisimasumik inuuneqarnissaat, atugarissaarneq aamma pikkorissuseq aallaaviginagit matusiniarneq siunnersuutigisimammassuk tupigusuutigeqaarput akuerisinnaanagulu, tusagassiutinut nalunaarumminni angajoqqaat Qorsussuarmi atuartuutillit ilaatigut taama allapput.
- Ukiuni qulini kingullerni Nuummi atuartut 500-nik ikileriarsimapput. Nuup ilaani Qinngorpumi atuarfik nutaaq 2011-mi atulersussaavoq, taannalu atulerpat atuarfiit amerlavallaalissapput, ilaatigut taama naliliivoq Kommuneqarfik Sermersuumi Atuarfeqarnermut pisortaq, Hans Peter Broberg, nangillunilu:
- Atuartut ikilinerisa kinguneranik atuartut klassimi ataatsimi atuartut ikileriartussaapput, agguaqatigiisillugu 16-iinnanngortussaallutik, tamannalu aningaasartuutit qaffannerannik kinguneqartussaavoq, Hans Peter Broberg oqarpoq.
Qinngorpumi atuarfik nutaaq, Hans Lyngep Atuarfia, atulerpat, atuartut 7. klasse tikillugu taamaallaat tassani atuartartussaapput, tamatumalu kingunerisaanik atuartut nuttartsinneqartartussaassapput.
- Siunissaq qanittunnguaq kisiat isigalugu sipaarniartoqarpoq, tamannalu akisunaarneqarsinnaavoq atuartut avissaartuutsinneqalissappata, Qorsussuarmi atuartuutillit angajoqqaat ilaat Margrethe Thårup Knudsen oqarpoq.
Hans Peter Brobergip ernumaneq paasisinnaavaa.
- Angajoqqaat aamma atuartut ernumassutaat, tassalu atuarfiup matunerata kinguneranik avissaartuutsitsisoqarnissaa, tassami tamanna ilumoorpoq. Maanna misissorparput atuartut avissaartuugatik allamut nuutsinneqarnissat, oqarpoq.
Kommuneqarfik Sermersuup siunnersuutigaa, Nuummi Qinngutsinni atuarfik nutaaq atuleriarpat, Qorsussuup matuneqarnissaa, taamatut siunnersuuteqarneq kommunalbestyrelsep novembarimi ataatsimiinnermini eqqartugassaasa pingaarnerit ilagissavaat.
