Angajoqqaarsiat akerliussutsimik takutitsissapput

Angajoqqaarsiat allagartarsualisaarlutik Inatsisartunut akerliussutsiminnik ullumi takutitsiniarput. Angajoqqaarsiat politikerinit tusaaniarneqannginnertik qatsulluinnarpaat. Pissutsit pitsaanerulernissaat piumasaraat massakkullu qanoq iliuuseqartoqarnissaa piumasaralugu.

Angajoqqaarsiat peqatigiiffianni siulittaasoq, Ellen Sofie Chemnitz, Nuummeersoq, akerliussutsimik takutitsinissamut piareeqqavoq.

- Pingajussaanneerluta politikerinut paasititsiniutiginiarparput, Nunatsinni meeqqat inuusuttullu sumiginnakkat, ikiorneqarnissamillu pisariaqartitsisut, amerliartuinnartut.

Aamma isumaqarpugut akerliussutsimik ukiuni kingullerni marlussunni takutitsisarnerigaluavut iluaqutaasimanngitsut. Peqatigisaanik meeqqat inuusuttullu sumiginnagaasimasorujussuit, ikiorneqarnissamillu pisariaqartitsisorujussuit, akisussaaffigileraangatsigik, angajoqqaarsiatut atornerlunneqartutut misigisimasarpugut.

- Akerliussutsimik takutitsinitsigut politikerit qanoq iliuuseqartoqartariaqarnera paasissagaat neriuutigaarput. Angajoqqaarsianik ilinniarsimasunik pilersitsisoqarnissaa aammattaaq neriuutigaarput, Ellen Sofie Chemnitz oqarpoq.

Meeqqanut angerlarsimaffiup avataanut inissinneqartartunut tarnip pissusaanik ilisimasalimmik ikiorsiisoqartarnissaa Ellen Sofie Chemnitzip ujartorpaa. Akerliussutsimik takutitsineq Ilaqutariinnermut pisortaqarfimmit Inatsisartut ataatsimiittarfiata tungaanut ullumi nalunaaqutaq pingasup qeqqanut ingerlanneqassaaq.