Angajoqqaarsianngortarnermut piumasaqaatit sukateriffigeqquaat

Angajoqqaarsianngortartut 25-nik ukioqalereersimanissaat pisariaqartoq angajoqqarsiat peqatigiiffianni siulittaasumit Birthe Abelsenimit naqissuserneqarpoq.

- Inuit allarluinnaat qitornai paaqqutarissagutsigit, inuttut inerisimassuseq, misilittagaqarsimanissarlu pisariaqarput. Aamma angajoqqaaviusut suleqatigissagutsigit killiliisinnaaneq pingaaruteqarpoq, angajoqqaat piumasarisaat aallaavigiinnarnagit, meeqqap qitiutinneqarnissaa eqqarsaatigalugu, Birthe Abelsen oqarpoq.

Angajoqqaarsianngortartut 25-nik ukioqalereersimanissaat pillugu siunnersuut nutaajunngitsoq, Birthe Abelsen erseqqissaavoq. Aamma angajoqqaarsianngortartut 25-nik ukioqalereersimanissaannik piumasaqaateqalernissaq qatanngutinik meerarsiaqalertarnermut atuuttariaqanngitsoq peqatigiiffimmit

Angajoqqaaviusut, angajoqqaarsiat kommunimilu isumaginnittut suleqatigiinnerat pitsaaneruleraluartoq, meeqqap qaqugukkut angajoqqaaviusunit takuniarneqartarnissaa peqatigiiffiup aamma kommunimit aalajangersartariaqarsoraa, pingaartumik angajoqqaat tarnimikkut napparsimasut eqqarsaatigalugit.

- Angajoqqaarsiammi angajoqqaaviusunik itigartitsinissamut ullumikkut pisinnaatitaaffeqanngillat, Birthe Abelsen oqarpoq.

- Angajoqqaaviusut ulloq unnuarlu assigiissillugu meerartik massakkorpiaq takorusullugu saaffiginnissinnaasarput. Angajoqqaarsiatut killiliisinnaanissaq pingaaruteqarpoq, meerarmi sulinitsinni qitiutittussaagatsigu, nassuiaavoq.

Anaanaviusup ataataviusulluunniit tassanngaannaq takkunnera angajoqqaarsianut meeqqap inuuneranik ingerlatitsiniartunut paatsuungatitsillunilu eqqissiveerutitsisinnaasarpoq.

- Meeraq inissinneqarsimasoq aamma toqqissisimajunnaarsinnaavoq, isumaqatigiissutit avaqqullugit tassanngaannaq takkutilaarneq immaqaluunniit iserneq pigaangat. Taamaakkaangat suleqatigiinniarneq oqimaatsorujussuusinnaavoq, Birthe Abelsen oqarpoq.

Angajoqqaarsiat meeraq paaqqutarisartik pillugu kommunimut ukiumoortumik aamma nalunaarusiortarput.