Angajoqqaarsiaasartunut sukaterisoqassanngilaq

Naalakkersuisut angajoqqaarsianik akuersissutiginnittarnermi malittarisassanik allannguinissamut pilersaaruteqanngillat. Tamanna erserpoq Atassutip naalakkersuisunut paragraf 36 atorlugu apeqquteqaateqarnerani.
januaarip 21-at 2008 05:19

Atassutip apeqquteqaateqarnermini, meeqqanut angerlarsimaffiup avataanut inissinneqartussanut angajoqqaarsiassatut akuerineqartartut piukkunnassusaat qanoq misissuiffigineqartarnersoq paaserisuppaa, piumasaqaatillu naalakkersuisunit sukaterneqassanersut ilanngullugu paaserisullugu.

Ilaqutariinnermut Peqqissutsimullu naalakkersuisup Arkalo Abelsenip aalajangiusimavaa angajoqqaarsiassatut akuerisat pinerluuteqarsimannginnerannik uppernarsaammik peqqissutsimillu uppernarsaammik peqarnissaat, soorluttaaq angajoqqaarsiassatut akuerisat 18-inik ukioqalereersimanissaat. Tamatuma kingorna kommunalbestyrelsep nalilertussaavaa angajoqqaarsiassatut qinnuteqartut angajoqqaarsiassatut piukkunnarnersut.

Angajoqqaarsiassatut akuerisat tarnip pissusaanik ilisimasalimmit nalilersorneqarnissaat naalakkersuisuinit pisariaqartinneqanngilaq. Akuersissuteqarnissamut suliaq taamaaliornikkut sivitsorsarneqassaaq, kommunimimi tarnip pissusaanik ilisimasalinnik amigaateqarmata, Naalakkersuisoq Arkalo Abelsen akissuteqarnermini allappoq.

Angajoqqaarsiassatut akuerisat ukiuisa minnerpaaffeqartinneqarnerat naalakkersuisunit aamma allanngortinniarneqanngilaq. Qatanngutigiinni arlaliusuni qatanngutaasoq 20-nik ukioqarsimappat taanna periarfissinneqassaaq qatanngutimi ukiukinnerusut akisussaaffigilernissaanut, angajoqqaajusut toqusimappata, Peqqissutsimut naalakkersuisoq, Arkalo Abelsen, Atassutip apeqquteqaateqarneranut akissuteqarnermini allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq