Angajoqqaanut peqatigiiffik Nuummi pilersinneqartoq
Nuummi angajoqqaat peqatigiiffittaarput - Nuummi angajoqqaat peqatigiiffissaat Rosannguaq Rossen siulittaasoralugu pilersinneqarpoq.
Peqatigiiffiup isumaginiarpaa meeqqat atugaat pillugit oqallittoqartillugu, Nuummi angajoqqaat sinnerlugit Peqatigiiffimmit peqataatitsisarnissaq.
- Meeqqat inuiaqatigiinni atugaat pillugit politikkikkut oqallittoqartillugu angajoqqaat nipaat erserpiartanngilaq. Kalaallit Nunaanni meeqqat atugaat pitsanngorsarneqassappata angajoqqaat akisussaaffimmik tigusisuussasut Kalaallit Nunaanni innuttaasut paasisariaqaleraat, peqatigiiffimmi siulittaasoq Rosannguaq Rossen tusagassiuutinut nalunaarummi taama allappoq.
Rossen ilanngullugu oqarpoq peqatigiiffik Nuummi angajoqqaat sinnerlugit oqaaseqartartoorusuttoq.
Amerlanernik peqatigiiffiliortoqarnissaanik kajumissaaruteqartoq
Taassuma angajoqqaat illoqarfinni allani peqatigiiffiliornissaat ilanngullugu kajumissaarutigaa, taamaalilluni angajoqqaat nipaat sakkortunerulissammat.
Nuummi Angajoqqaat peqatigiiffiata siunertaraa, angajoqqaat Nuummi atuartuutillit ilaasortanngornissaat, taamaalillutik peqatigiiffimmik ilusilersueqataallutik, minnerunngitsumillu inuiaqatigiinni oqalliseqataallutik.
Nuummi Angajoqqaat Peqatigiiffianni Mudi Kramer Berthelsen siulittaasumut tulliuvoq, Pipaluk Møllerilu aningaaserisuulluni.