Angajoqqaanngorlaat pikkorissartinneqartaleqqugai

2009-mi januaarip aallaqqaataa allarnerfigalugu angajoqqaanngortussat tamarmik angajoqqaanngortussatut pikkorissartinneqartalernissaat demokraatineersup Jens B. Frederiksenip ullumi inatsisartut ataatsimiinneranni siunnersuutigimmagu Siumukkunnit Kasseqatigiinnit Demokraatiniillu tapersersorneqarluarpoq.

- Angajoqqaanngortussat tamaasa eqqarsaatigivakka angajoqqaanngortussalli sanngiinnerit tassani eqqarsaatiginerullugit, Jens B. Frederiksen oqarpoq.

Taanna imminut assersuutigaluni oqarpoq sisamanik qitornaqarluni angajoqqaanngoqqaaramilu nalornisarsimanini assersuutigalugu.

Taanna aperaarput sunarpiaq tunuliaqutaralugu taama siunnersuuteqarnersoq.

- Sorpassuit perorsaanermut tunngasut eqqaaneqarsinnaapput, una aqqutigalugu angajoqqaanngortussat aqqutissiuunneqarsinnaapput, oqarpoq.

Aperaarput kikkut pikkorissartitsisuunissaat takorloorsimaneraa.

- Immikkut ilisimasallit eqqarsaatigineqarput. Una takorloorneqarsinnaavoq nalinginaasumik arnaq qaammatit qulingiluat naartusarpoq, naartunerminilu erninermut piareersartinneqartarpoq, piareersarnermut tassunga assingusumik pikkorissartitsisoqarsinnaavoq taamaallaat assigiinngissutigalugu una perorsaanermut tunngassuteqassammat, Jens B. Frederiksen oqarpoq.

Angajoqqaanngortussat pikkorissartinneqartaleraluarpata Jens B. Frederiksenip akisussangatinngilaa.

Ilaqutariinnermut naalakkersuisup Aleqa Hammondip siunnersuut ilalernartinngilaa, suliniutit assingusut arlallit aallartinneqareersimanerat tunngavigalugu.

Siunnersuutip aappassaaneerneqannginnerani ilaqutariinneq pillugu ataatsimiititaliamut ingerlatinneqartussanngortinneqarpoq.