Ane Hansenip Tunumi qalerallit nungunnginnissat sulissutiginiarpaa

Aappaagumut aalisagartassiissutissanut tungatillugu Pinngortitaleriffiup inassutini marlunngormat aggustip 31-anni tamanut saqqummiuppai.

Oqariartuutit paasinarluinnarput. Tunumi qalerallit suli ikiliartorput, sulilu saarulikippallaaqaaq.

Pinngortitaleriffimmeersoq Helle Siegstad sisamanngornermi oqarpoq, Tunumi qalerallit amerliartulissappata, annerpaamik 5000 tonsit Nunatsineersunit, Islandimiuneersunit Savalimmiuneersunillu pisarineqarsinaasut. Amerlassusaat nikissanngippata 10.000 tonsit pisarineqarsinnaapput. 15.000 tonsit pisarineqarpata, nungukkiartulernissaat annilaanngatigisariaqarpoq.

- Oqaatigisinnaavara, inassutigissagakku ikiliartorunaarnissaat anguniarneqassasoq, Ane Hansen ullumi oqarpoq.

Kisianni Pinngortitaleriffiup inassutaa erseqqilluinnartoq alla, tassalu aappaagu saarullinniartoqassanngitsoq, Ane Hansen ullumikkut isummerusunngilaq.

- Taanna oqaatigisinnaanngilara, massakkut saqqummiunneqartut aallaavigalugit tusarniaanerit ingerlanneqareertinnagit.

Qeqertarsuup tunuani qaleralittassat siornarnit ikinnerulaarlutik 8.000 tonsiussasut Pinngortitaleriffiup inassutigaa. Tamaani pisassat siorna tamakkerneqanngillat, 6.300 tonsiinnaat pisarineqarlutik.

Biologillu inassutaat Ane Hansen ip malinniarpai:

Ane Hansen aalisarnermut naalakkersuisunngooramili sukannersumik aqutsilernissamik neriorsuuteqarnikuuvoq. Ullumi oqarpoq, qaleralliniarnermik aqutsinissamut pilersaarut suli suliarineqartoq.

- 2011 ikaarsariarfittut atorneqassasoq naatsorsuutigineqassaaq. Taava 2012-miit sukanngersumik aqutsilernissaq naatsorsuutigineqalersinalluni, aalisarnermut naalakkersuisoq oqarpoq.