Ane Hansenip aaqqiiniarnera aalisartut itigartippaat

Aalisarnermut naalakkersuisup, Ane Hansenip (IA), Nuummi aalisartut kamaqqasut aggersarpai. Pisortat akiligaannik saarulliit akiisa minnerpaaffilerneqarnissaannik piumasartik anguniarlugu, aalisartut Nuummi umiarsualivimmik assersuinissaannut nalunaaquttap akunneri marluinnanngortullu ataatsimiittoqassaaq.

Kisianni ataatsimiinneq assersuinissamut apeqqutaassanngitsoq, aaqqissuisut ilaat Johannes Heilmann, oqarpoq.

- Saarullinnut akit minnerpaffilerneqassasut, aalisartut piumasaraat. Taama pisoqanngippat, umiarsualivik ullup qeqqaniit assersulissavarput, Johannes Heilmann oqarpoq.

Saarulliit akiisa minnerpaaffilerneqarnissaat, aalisartunit piumasarineqarpoq, naak Naalakkersuisoqatigiinnit tamanna inatsisitigut tunngavissaqannginnerarlugu itigartitsissutigineqaraluartoq.

Umiarsualivimmik assersuisoqassaaq, kingornalu sissamiit Naalakkersuisoqarfiup tungaanut ingerlaaqatigiittoqassalluni, ingerlaaqatigiittut allagartarsualisaassapput, Nuummi aalisartut sinnerlugit Johannes Heilmann oqarpoq.

Aalisartut akinik minnerpaaffiliinissaq anguniarpaat, tamannalu Royal Greenlandimut aningaasaliissutit iluini nassaarineqarnissaat piumasaraat.

- 250 millioni koruunit iluini aalisakkat akiisa minnerpaaffilerneqarnissaat ujarneqarsinnaasariaqarpoq, tassami Royal Greenlandip aalisartunit pilersorneqarnissani pisariaqartippaa, Johannes Heilmann oqarpoq.

Aalsiartut erseqqissapaat, KNAPK assersuiniarnermut ilaanngimmat.