Ane Hansen IA ataatsimiititaliami kisimiilluni illersuivoq

Inatsisartut aalisarnermut piniarnermullu ataatsimiititaliaata siulittaasua,

Ane Hansen, IA-meersoq, ataatsimititaliami kisiartaalluni, raajat pillugit nalunaarummik ukiortaami atuutilersumik illersuisuuvoq. Aalisarnermut ataatsimiititaliaq tallimangoramat ataatsimiippoq.

Ataatsimiititaliami ilaasortat sinneri, tassalu Jens B. Frederiksen, Demokraatinit, Augusta Salling, Atassut, Jens-Lars Fleischer aammalu Lars-Emil Johansen Siumut, nalunaarummut nutaanngitsumut uternissamik illersuisuupput.

Inatsimmi nutaami raajat pisarineqarsimasut pisatullu allattorneqarsimasut naatsorsorneqartarnerat aallaaviuvoq, siornatigutunngitsoq tassalu tunineqarsimasut annertussusiat aallaavigalugu. Pisarineqarsimasut igitassatut naatsorsuussat annertussutsinut ilannguneqartalerlutik.

Raajat pillugit nalunaarusiaq raajarniartartunit tamanit isumaqatigineqanngilaq. Isumaqataanngitsut tassaapput Kalaallit Nunaanni Aalisartut Piniartullu Kattuffiat, KNAPK, piginneqatigiiffik Polar Seafood Sulisartullu Kattuffiat, SIK.

Aalisarneq pillugu isumasioqatigiittoqarsimanera Inatsisartut aalisarnermut ataatsimiititaliaani siulittaasup, Ane Hansenip, ulloqeqqaanerani Radioaviseqarnerani eqqumiigaa, KNAPK Siumullu peqataasoralugit. Ullup qeqqanut Ane Hansen-ip ulloqeqqaanerani oqaaseqarnera tunngavigalugu aalisarnermut ataatsimiititaliami ilaasortat sinneruttut tusagassiuutinut nalunaaruteqarput, namminneq aalisartut/raajarniartartut isumaqatigigamikkik raajat pillugit nalunaarummut nutaanngitsumut tapersersuillutik.