Ane Hansen: Aalisartut naligiinnerusumik pisassinneqarlik
Avataasiornikkut qangalili suliffissaqartitsisut aalisartooreersullu eqqarsaatigalugit naalakkersuisut pilersaarusiorsimasussaagaluartut, Inuit Ataqatigiit aalisarnermut tunngasunut oqaaseqartartuat Ane Hansen oqarpoq.
- Matut tunuatigullusooq inuit ataasiakkaat kisiisa neqeroorfigineqarneri Inuit Atqatigiinnit akuersaarsinnaanngilarput. Uagut isumaqarpugut aalisartut tamarmik periarfissanik ilisimatinneqarsimasariaqaraluarput, qinnuteqaateqarnissaannullu periarfissinneqarlutik, Ane Hansen oqarpoq, nangipporlu:
- Ukiorpassuarni aalisartooreerlutik avataasiorlutillu maanna aamma aalisartut pisassinneqanngitsoornerit pissutigalugit akiliisinnaajunnaarsinnaanerat mianersuutigisariaqarparput, taamaammat naalakkersuinikkut pilersaarusiornissaq iliuuseqarnissarlu pisariaqarluinnarpoq, Inuit Ataqatigiit aalisarnermut tunngasunut oqaaseqartartuat Ane Hansen oqarpoq. Saarullinnik pisassiinermi aalisarnermut inatsit malinneqarsimanersoq Ombudsmandip Vera Lethip misissuiffigilerpaa.