Ane Hansen: 2000 tonsit piviusorsiunngillat
-Piviusorsiunngillat 2000 tonsit taassallugit. Ullumikkut angallatigineqartut pisinnaasai aammalu ukiup imaalinera eqqarsaatigalugu ukiullu sinnerani aalisarnerup annikilliartortarnera eqqarsaatigalugu 2000 tonsinik pisasseeqqusineq taanna piviusorsiornerunngilaq. Aamma pisassaasunut massakkut innersuussutigineqarpoq annerpaamik 5000 tonsi Uummannap eqqaani aalisarneqarnissaanut inassutigineqarluni. Taamaattumik affaata tungaanut ilaseqqusineq peqassutsimut innarliinani ingerlanneqarinnaanngilaq.
Aalisarnermut Naalakkersuisoq Ane Hansen oqarpoq. Taassuma siunersuutigaa Upernavimmi Qeqertarsuullu tunuani saniatigut 500 tonsinik pisassiisoqassasoq.
-Oqaatigisinnaavara takusinnaasagut malillugit Upernavimmi Ilulissallu eqqaani, tassa Qeqertarsuup tunuani pisassiissutit affaat sinniliaaginnarlugit maanna aalisarneqarnikuummata. Ukiullu imaalinera eqqarsaatigillugu isumaqarpunga illersorneqarsinnaasumik angallatit anginerit taakkununnga illuartinneqarsinnaasut. Taamaalilluni ukiup naanissaanut immikkut ittumi pisassiinerit naammassinnaallutik, Ane Hansen oqarpoq.
Nunanit allanit isiginninneq allanngortinngikkaluarlugu saniatigut pisassiisoqarsinnaavoq.
- Ukiuni kingullerni eqqarsaatigalugu nunarsuarmioqatigiit niuernerup iluani pingaartinneqarnerujartuinnarpoq piuartitsineq aallaavigalugu tunisassiarineqarsimasunik kisimi piserusuttoqarluni. Taamaattumik massakkut MSI-mik misissuineq assersuutigalugu EU-p peqqussusiaa ukioq manna atuutilersoq januarimiit IUU-mik taaneqartartoq tamakkua eqqussuunneqartut. Naatsorsuutigineqassaaq siunissami suli sukannernerusumik piumasaqartoqassasoq nunarsuarmioqatigiinninngaanniit, Ane Hansen oqarpoq.
Ukiut ataasiakkaarnagit, kisianni ukiut arlalikkaarlugit Naalakkersuisut pisassiisalerniarput, aalisartut siunissamut pilersaarusiorsinnaaniassammata.
-Pilersaaruteqarpugut aqutsinermut tungatillugu aalisakkat assigiingitsut eqqarsaatigalugit, tassa pilersaarutaavoq aalisakkat soorlu qalerallit eqqarsaatigalugit kvotilersuisoqalissasoq. Aammalu kvotekkaarlugit tunniussat siunissaq eqqarsaatigalugu aamma aalisartut akornanni niuffatigineqarsinnaalissasut. Taamaalillutik siunissaq ungasinnerusoq eqqarsaatigalugu nutartertuarnissaq qulakkeerussummik pisoqarsinnaaniassammat. Aamma pilersaarutigivarput ukiut ataasikkaarnagit, kisianni ukiut arlalikkaarlugit pisassiisarnerit ingerlanneqalissasut. Tassani aamma aalisartut siunissaq eqqarsaatigalugu pilersaarusiortalernissaat pitsaanerusoq angorusullugu, Ane Hansen oqarpoq.
