Anders Fogh: talebanit ajugaassanngilluinnarput
Toqusoqaraangat ajortaraluaqaaq, pingaarporli oqaatigissallugu qallunaat sakkutuui Afghanistanimi pingaaruteqartorujussuarmik sunniuteqartut, Afghanistanimiut uagullumi toqqissisimanissarput anguniarlugu suliaqarput, Anders Fogh Rasmussen oqarpoq.
Statsministeri ullumi aamma oqarpoq Socialdemokratit tapersersoraanni.
Afghanistanip kujasinerusortaani nunap immikkoortortaani Hellmannimi sakkortunerpaamik akersuuffimmi qallunaat sakkutuui inissisimapput.
Hellmannimi Natop sakkutuuisa talebanillu imminnut sanilliullutik qanoq nalilerneqarsinnaanersut, DR-imi tusagassiortup arlaleriarluni Afghanistanimiittarsimasup, Henrik Lerchep oqaasii imatut oqarpoq:
Natop sakkutuui pissaaneqarnerusinnaagaluaqaat, pitsaanerusunik sakkortunernillu sakkoqarput, pitsaanerusumillu ilinniartitaallutik, talebanilli maanakkut pissaaneqarnerorpasinnerat pissuteqarpoq nuna angallavigiuminaatsoq, qaqqaqarlunilu, inoqajuitsulik, kuussuaqarlunilu, orpippassualik angallavigissallugu sungiusimaqigamikku. Natop angallataat qajannaatsut nutaaliaagaluarput nunalli ilaani iluaqutaasinnaanatik, taamaammat talebanitulli pisuinnartariaqarlutik ulorianartorsiungaarlutik. Isumaqanngilanga maannakkut qallunaat sakkutuuisa 150-inik ilanissaat naammattoq. Hellmannimi talebanit sakkutooqaannaratik aamma nunap inuisa akornani tapersersuisoqaqaat. Ajoraluartumik ilimanarpoq qallunaat sakkutuui amerlanerusut toqutaanissaat.
